हिमायतनगर (जिल्हा नांदेड) : उमरखेड तालुक्यातील परंतु हिमायतनगर तालुक्याच्या सिमेला लागून असलेल्या पैनगंगा अभयारण्य वनपरीक्षेत्रातील भवानी गावानजीक चिखली शिवारातील एका विहीरीत पडलेल्या अस्वलाला वन विभागाकडून जीवनदान मिळाले.

वन्यजीव विभागाच्या सुत्रानुसार गुरुवार (ता. १०) रोजी चिखली शिवारातील बाबुराव बेले यांच्या शेतातील एका जमीनस्तर असलेल्या विहिरीत अस्वल पडल्याची माहिती शेतमालकाने यांनी वन विभागाला दिली.  माहिती मिळताच तत्काळ कोरटा वन परिक्षेत्राचे वनपाल सुदर्शन पांडे आपल्या टीमसह घटनास्थळी हजर झाले. 

हेही वाचा -  नायगांव नगरपंचायतमध्ये सन्मानपूर्वक जागा नाही मिळाल्यास शिवसेना स्वबळाचा नारा देणार- जिल्हाप्रमुख उमेश मुंडे -

सदर अस्वल सकाळी खाद्य शोधासाठी फिरत असताना जमीनस्तर असलेल्या विहिरीत पडला.  वनकर्मचाऱ्यांनी लगतची सर्व शेती खाली करुन घेतली लगेच विहिरीत एक खाट दोरी बांधून विहिरीत सोडली. नंतर विहिरीत लाकडी शिडी सोडली आणि त्या शिडीच्या साहाय्याने अस्वल लगेच विहिरीबाहेर आले आणि जंगलात पळाले.
 
सदर अस्वलास कोरटा वनपरिक्षेत्र तर्फे रेस्क्यू ऑपरेशन करुन विहरीतुन जीवंत बाहेर काढण्यात आले. सदर कार्य  विनायक खैरनार वनपरिक्षेत्र अधिकारी कोरटा, हेमंत उबाले वनपरिक्षेत्र अधिकारी महागाव, ओमप्रकाश पेंडोर वनपरिक्षेत्र अधिकारी बिटरगाव यांचे मार्गदर्शनात एस. एस. पांडे वनपाल कोरटा, अजय राऊत वनपाल बिटरगाव, वनरक्षक श्रीराम खंदारे, बालाजी गुट्टे,  मंगल चव्हाण, अनिल राठोड यांच्या टिमने  केले तसेच या कार्यात दराटी पोलिस ठाण्याचे तसेच स्थानिक गावकरी यांनी सुध्दा मोलाचे सहकार्य केले.

संपादन - प्रल्हाद कांबळे