नांदेड : येथील तुरुंगातील कैद्याकडे सापडलेल्या मोबाईलमुळे अतिरिक्त पोलिस महासंचालक (कारागृह) यांनी कारागृह अधीक्षकांवर कारवाई करुन त्यांची रवानगी नियंत्रण कक्ष पूणे येथे केले आहे. त्यांना हर्सुल कारागृह औरंगाबाद येथे हजेरी देण्याची शिक्षाही देण्यात आली आहे. 

नांदेड तुरुंगात असलेल्या कैद्यांकडे मोबाईल सापडल्यानंतर तुरुंग प्रशासनाच्या वतीने दिलेल्या वजिराबाद पोलिस ठाण्यात दोघांविरुद्ध गुन्हा दाखल करण्यात आला होता. तुरुंगातील कर्मचारी सय्यद अली शेर यांनी दिलेल्या तक्रारीवरुन ता. २६ डिसेंबर रोजी रात्री आठच्या सुमारास नांदेडच्या तुरुंगातील बॅरेक क्रमांक तीनमध्ये दिनेश बालाजी परसे आणि परमजीतसिंग हे दोघे आपल्याकडील मोबाईलवरुन बाहेरच्या लोकांना बोलताना सापडले.

हेही वाचा - नांदेड : मी पुन्हा येणार म्हणू नका... सोशल माध्यमातून भावी सरपंचाना दिला जातोय सल्ला.. -

कैद्यांकडून मोबाईल जप्त करुन दिलेल्या फिर्यादीनुसार वजिराबाद पोलिसांनी कट रचणे यासोबत भारतीय दंड संहितेच्या कलम १८८ आणि १२० अधिनियम ४२ आणि ४५ नुसार गुन्हा दाखल केला. या प्रकरणाचा तपास वजिराबाद पोलिस करत होते. तुरुंगात बंद्यांना मोबाईल वापरण्यासाठी बंदी असताना त्यांच्याकडे मोबाईल कसा आला हा एक मोठा विषय असून त्याचाही शोध सुरु आहे. घडलेल्या प्रकरणाची गंभीर दखल कारागृह प्रशासनाने घेतली. याचा फटका येथील कारागृह अधीक्षक रामराजे चांदणे यांना बसला. त्यांच्यावर कारवाई करत त्यांची रवानगी नियंत्रण कक्ष पूणे येथे बोलावून घेतले. सध्या नांदेड कारागृहाची धूरा सध्या पोलिस उपाधीक्षक दर्जाचे श्री. सोनुने यांच्यावर टाकण्यात आली आहे.