नांदेड - मागील आठ ते दहा महिन्यापासून कोरोनासारख्या आजारास न घाबरता स्वताचा जीव धोक्यात घालुन संशयीत व्यक्तींचे स्वॅब घेऊन ते चाचणीसाठी लॅबमध्ये पाठविण्यापासून ते रिपोर्टचे वाटप करण्यापर्यंत सर्व कामे करणाऱ्या डॉक्टर आणि आरोग्य कर्मचाऱ्यांना पुष्पगुच्छ देण्याऐवजी त्यांना नाना नानी पार्कमधील कोरोना चाचणी सेंटरमध्ये प्रवेश करुन धक्काबुक्की करण्यात आल्याचा गंभीर प्रकार घडल्याचे समोर आले आहे. 

नेहमीप्रमाणे नाना नानी पार्क येथे कोरोना चाचणी सुरु होती. दरम्यान, महिलेच्या दंडास का धरले? असे म्हणत काही तरुणांनी नाना नानी पार्कमधील सेंटरमध्ये घुसुन आरोग्य कर्मचारी यांना धक्काबुक्की केल्याने कोरोना चाचणी सेंटरवरील १५ कर्मचाऱ्यांनी मिळुन काम बंद आंदोलन करण्याचा निर्णय घेतला. विशेष म्हणजे महिला शिक्षकेच्या दंडाला धरल्याच्या कारणावरुन संबंधित महिलेनी शिवाजीनगर पोलीस ठाण्यामध्ये डॉक्टरांविरोधात गुन्हा दाखल केला. 

हेही वाचा - नांदेड तालुक्यात ३७ महिलांना मिळणार सरपंचपदाचा मान

जिल्हाधिकारी डॉ. विपीन यांना निवेदन 

दरम्यान, मारहाण करणाऱ्या तरुणांविरोधात डॉक्टर जेव्हा शिवाजीनगर पोलीस ठाण्यामध्ये तक्रार दाखल करण्यासाठी गेले असता राजकीय दबावापोटी त्यांची तक्रार दाखल करुन घेतली जात नसल्याने कोरोना स्वॅब घेणाऱ्या डॉक्टर व टेक्निशियन कर्मचारी नाराज झाले होते. 
शेवटी सर्वजण मिळुन महापालिका आयुक्त डॉ. सुनील लहाने व जिल्हाधिकारी डॉ. विपीन यांना भेटुन तक्रारीचे निवेदन दिले. 

हेही वाचा - रोहित शर्मा, धवल कुलकर्णी नांदेडमध्ये उभारणार क्रिकेट अकादमी! पालकमंत्री अशोक चव्हाण यांच्याशी चर्चा

दिवसभर कोरोना सेंटर बंद 

त्यामुळे दिवसभरात एकही स्वॅबची तपासणी करण्यात आली नाही किंवा एकाही व्यक्तीला कोरोनाचा रिपोर्ट देण्यात आला नाही. त्यामुळे अनेक शिक्षक व नागरीक स्वॅब देण्यासाठी नाना नानी पार्कभोवती चकरा मारत होते. कोरोना सेंटर बंद असल्याने त्यांना पुन्हा घरी परतावे लागत होते.