अर्धापूर : शेतमजुरी (Nanded Ardhapur) आणि वाहन चालवून उदरनिर्वाह करणाऱ्या वसरणी (ता. जि. नांदेड) येथील तरुण दाम्पत्यानं विषारी औषध प्राशन करून आपली जीवनयात्रा संपवण्याचा प्रयत्न केल्याची घटना शनिवारी सकाळी दाभड शिवारात (ता. अर्धापूर) उघडकीस आली आहे.

या घटनेत पत्नीचा मृत्यू झाला असून पतीला उपचारासाठी नांदेड येथील शासकीय रुग्णालयात दाखल करण्यात आलं आहे. या प्रकरणी अर्धापूर पोलिस (Ardhapur Police) ठाण्यात गुन्हा नोंदवून घेण्याची प्रक्रिया सुरू झाली आहे.

या प्रकरणी पोलिस सूत्रांकडून मिळालेली माहिती अशी, की वसरणी येथील कैलास बापुराव डोंगरे व त्यांची पत्नी ललिता कैलास डोंगरे हे वाहन चालवून उदरनिर्वाह करतात. ते शुक्रवारी (ता. चार) दुपारी घरातून बाहेर पडले होते. त्यांच्या नातेवाईकांनी शोधाशोध सुरु केली. नांदेड-अर्धापूर रस्त्यावरील दाभड शिवारात शनिवारी सकाळी साडेआठ वाजण्याच्या सुमारास बेशुद्ध अवस्थेत पडलेले नागरिकांच्या निदर्शनास आले.

ही माहिती अर्धापूर पोलिस ठाण्याला कळविण्यात आली. ही माहिती मिळताच पोलिस उपनिरीक्षक अंकुश नागटिळक, कल्याण पांडे, संजय घोरपडे, गोरकर घटनास्थळी दाखल झाले. घटनेची माहिती घेतली, तेव्हा ललिता कैलास डोंगरे यांचा मृत्यू झाला होता व कैलास डोंगरे हे बेशुद्ध अवस्थेत होते. त्यांना उपचारासाठी नांदेड येथील शासकीय रुग्णालयात दाखल केलं.

तर, ललिता डोंगरे यांचे पार्थिव अर्धापूर ग्रामीण रुग्णालयात उत्तरीय तपासणीसाठी आणले. मयत दाम्पत्यास तीन मुली आहेत. एका मुलीचा विवाह झाला आहे. तर, या प्रकरणी अर्धापूर पोलिस ठाण्यात तक्रार दाखल करण्याची प्रक्रिया सुरू होती. या घटनेमुळे वसरणीत हळहळ व्यक्त केली जात आहे.