नांदेड : कर्तव्य कठोर खात्यात काम करतांना आपल्या कामाची दखल वरिष्ठांनी घ्यावी असे प्रत्येक अधिकारी व कर्मचाऱ्यांना वाटते. जीव धोक्यात घालून आपल्या हद्दीतील गुन्हेगारांना पकडून समाजात शांतता प्रस्थापीत करण्याचे महत्वाचे काम पोलिसांना करावे लागते. अशाच प्रामाणीकपणे आपल्या पदाला न्याय देऊन गुन्हे उघडकीस आणणाऱ्या अधिकारी व कर्मचाऱ्यांचा दरमहा तिघांचा प्रशस्तीपत्र देउन सन्मान करण्यात येत आहे. ही संकल्पना विमानतळ पोलिस ठाण्याचे निरीक्षक संजय ननवरे यांनी सुरू केला असून काम करणाऱ्या कर्मचाऱ्यांना प्रोत्साहान मिळत आहे. 

पोलिस म्हंटले की त्याला सर्वच आघाड्यावर लढावे लागते. मात्र आपले कर्तव्य बजावत असतांना ‘खलनिग्रहनाय- सद्रक्षणाय’ या पोलिस खात्यातील उक्तीप्रमाणे सर्वचजण सेवा देतात. परंतु काही जण त्याला अपवाद असतात. आपल्या उभ्या आयुष्यात त्यांना आपल्या पदाला न्याय देता येत नाही. तर काही जण आपण चांगल्या समाजासाठी या कर्तव्य कठोर खात्यात आलो. हे भान ठेवून वरिष्ठ अधिकाऱ्यांची मर्जी राखत आपले काम करतात. मग तो रस्ता बंदोबस्त असो की किंवा एखादी दंगल असो. पोलिसाला रस्त्यावर उतरावेच लागते.

 हेही वाचा - कोरोनाच्या संकटकाळात वधू-वरांसाठी धावून आले साईप्रसादचे नाथ

जीव धोक्यात घालून गुन्हेगारांना पकडतात

अशा काम करणाऱ्या पोलिस किंवा अधिकाऱ्यांना आपल्या वरिष्ठांकडून पाठीवर कौतूकाची थाप पडावी असे वाटते. त्यासाठी ते जीव धोक्यात घालून गुन्हेगारांना पकडतात. अनेकवेळा त्यांच्यावरसुद्धा प्राणघातक हल्ले होतात. मात्र आपल्या कर्तव्यात कुठलीच कसुर ठेवत नाहीत. तपासाची प्रकरणे निकाली काढणे, गुन्हे उघडकीस आणणे, कायदा व सुव्यवस्था बाधीत होणार नाही यासाठी जनतेशी सुसंवाद साधणे आणि पोलिस ठाण्यात आलेल्या पिडीतांना न्याय देण्याचा प्रयत्न करणाऱ्या पोलिस अधिकारी आणि कर्मचाऱ्यांना दरमहा प्रशस्तीपत्र देउन सन्मानीत करण्यात येत आहे. तसेच पोलिसांचा दरबारसुध्दा घेऊन त्यांच्या अडचणी ऐकूण घेण्यात येतात. 

येथे क्लिक करा -  चोरट्यांना न्यायालयीन कोठडी- खंजर, मोबाईल्स आणि दुचाकी जप्त

संजय ननवरे यांनी ‘सकाळ’शी बोलत होते

यामुळे काम करणाऱ्या पोलिसांचे आत्मबल वाढत आहे. प्रशस्तीपत्र मिळालेला कर्मचारी हा पुन्हा नव्या दमाने कामाला लागतो. यामुळे पोलिस ठाण्याच्या हद्दीत कायदा व सुव्यवस्था बिघडत नाही. सर्वसामान्य नागरिक निर्भयपणे राहु शकतो. पोलिस खात्यात काम करतांना प्रत्येकाला अडचण असते. मात्र ती अडचण समजुन हातपाय न हलवणाऱ्या कामचुकार कर्मचाऱ्यांना मात्र कधीच वरिष्ठांकडून पाठीवर थाप मिळत नाही. मात्र पोलिस निरीक्षक संजय ननवरे यांनी सुरू केलेल्या या अभिनव उपक्रमाची जिल्ह्यातील सर्वच पोलिस ठाणे प्रभारी अधिकाऱ्यांनी नोंद घेतली तर नक्कीच गुन्हेगारीवर आळा बसु शकतो असे मत पोलिस निरीक्षक संजय ननवरे यांनी ‘सकाळ’शी बोलतांना व्यक्त केले.