नांदेड : ‘कोरोना’च्या प्रतिबंधकात्मक उपाययोजनेसाठी नांदेड जिल्हा परिषदेमध्ये येणाऱ्या अभ्यांगतांसाठी हॅन्डवॉश स्टेशनच्या माध्यमातून हात धुण्याची व्यवस्था करण्यात आली आहे. जिल्हा परिषदेच्या अध्यक्षा मंगाराणी अंबुलगेकर व जिल्हा परिषदेचे मुख्य कार्यकारी अधिकारी डॉ. शरद कुलकर्णी यांनी सर्व कर्मचारी व जनतेला साबणाने स्वच्छ हात धुण्याचे आवाहन केले आहे.

जिल्ह्याच्या ठिकाणचे जिल्हा परिषद कार्यालय म्हणजे दुसरे मिनी मंत्रालय अशी या कार्यालयाची सर्वसाधारण ओळख असते. ग्रामपंचायतीपासून ते जिल्हा परिषदेपर्यंतची सर्वच महत्वाची कार्यालये व त्यांचा कारभार याच कार्यालयाच्या माध्यमातून चालतो. त्यामुळे जिल्हा परिषद कार्यालयात रोज काही ना काही महत्वाची कामे व निर्यण होत असतात. अनेक वेळा जिल्हा परिषदेच्या सर्वसाधारण सभेत वाद - विवाद होतात. सभा वादळी होते  कोट्यवधी कामांच्या निविदा, प्रस्तावास मंजुरी दिली जाते.

हेही वाचा -  नांदेड ब्रेकिंग : आज तीन पॉझिटिव्ह, रुग्णांची संख्या ३८

स्वच्छ धुण्यासाठी सुविधा

अशा या नांदेडच्या जिल्हा परिषद अर्थातच मिनी मंत्रालयात आता सॅनिटायझरने हात धुतल्याशिवाय प्रवेश दिला जाणार नाही. जिल्हा परिषदेच्या अध्यक्षा मंगाराणी अंबुलगेकर व जिल्हा परिषदेचे मुख्य कार्यकारी अधिकारी शरद कुलकर्णी यांनी जिल्हा परिषदेच्या प्रागंणात प्रवेश करणाऱ्या प्रत्येक व्यक्तीस हात स्वच्छ धुण्यासाठी सुविधा उपलब्ध करुन दिल्या आहेत.
 
जिल्हा परिषदेच्या आवारातील वाहनतळ परिसरात वॉश बेसिन तयार करण्यात आले आहे. तसेच प्रवेशद्वाराजवळ एका कर्मचाऱ्याची नियुक्ती केली आहे. प्रवेश द्वाराजवळ अभ्यागतांची नोंद केल्यानंतर त्यांचे हात सॅनिटाईज केले जाणार आहेत. लिफ्टच्या बाजूसही वॉश बेसिनची व्यवस्था करण्यात आली आहे. हात धुण्यासाठी हँडवॉश ठेवण्यात आले आहे. प्रत्येक अधिकारी व कर्मचारी हात धूऊनच जिल्हा परिषदेमध्ये प्रवेश करत आहेत.

हेही वाचा - ...तर राजीनाम्याविषयी पुनर्विचार करावा

वारंवार हात धुवा - 

‘कोरोनो’चा अटकाव करण्यासाठी वारंवार हात धुवा. हाताची स्वच्छता ही महत्वाची आहे. तोंडाला हात लावू नका. खोकताना व शिंकताना नाकावर व तोंडावर रूमाल धरा, ताप, कोरडा खोकला व श्वास घेण्यास त्रास होत असलेल्या व्यक्तींशी निकटचा संपर्क टाळावा

 आपल्या आरोग्याची काळजी घ्या
‘कोरोना’ कायमस्वरूपी जवळ येऊ द्यायचा नसेल तर हात धुण्याशिवाय पर्याय नाही. स्वच्छतेसाठी हात धुणे ही सवय लावून घेणे आवश्यक आहे. ग्रामीण भागात ग्रामसेवक, अंगणवाडी कार्यकर्ती, आशा व स्वेच्छाग्रही हे गृहभेटीतून गावकऱ्यांचे मोठ्या प्रमाणात प्रबोधन करत आहेत. नागरिकांनीही वारंवार आपले हात साबणाने स्वच्छ धुवावेत.

मंगाराणी अंबुलगेकर - जिल्हा परिषद अध्यक्ष