नांदेड : मागील दोन दिवसांपासून जिल्ह्यातील कोरोना पॉझिटिव्ह रुग्णांची संख्या वाढत आहे. यातच जिल्हा प्रशासनाकडून प्रसिद्ध करण्यात येत असलेल्या पत्रकात अमुक इतके प्रवाशी नागरिक असल्याचा स्पष्ट उल्लेख केला जात आहे. परंतु, प्रवाशी म्हणजे नेमके कोणते नागरिक, गुरुद्वाऱ्यातील यात्रेकरु तर नाहीत ना? अशी सामान्य नागरिकांकडून विचारणा होत होती. गुरुद्वारा परिसरात आलेले यात्रेकरुंची पॉझिटिव्ह संख्या वाढत असल्यामुळे त्या परिसरात राहणाऱ्या नागरिकांमध्ये चांगलीच दहशत पसरली होती. 

जसपाल सिंघ सिधू नावाच्या एका रहिवाशाने सोशल मीडियाच्या माध्यमातून ‘प्रवाशी नागरिक म्हणजे नेमके कोणते नागरिक? याबद्दल प्रशासनाकडे भित भित का होईना मागणी केल्याचेदेखील आढळुन येते. शनिवार (ता.१६) आणि रविवार (ता.१७) एकुण ३१ कोरोना पॉझिटिव्ह रुग्ण आढळुन आले आहेत. यामध्ये २२ रुग्ण हे प्रवाशी असल्याचा उल्लेख असला तरी, प्रवाशी म्हणजे नेकमे कोण याबद्दल माहिती दिली जात नव्हती. विशेष म्हणजे यातील बहुतेक रुग्ण हे १३ ते ३० वयोगटातील अतिशय तरुण असल्याचे प्रसिद्ध पत्रकात दिलेल्या माहितीवरुन दिसून येते. 

हेही वाचा - नांदेडची शतकाकडे वाटचाल : आज पुन्हा १३ पॉझिटिव्ह

प्रवाशी नागरिकांचा गैरसमज नको

पॉझिटिव्ह रुग्णांची माहिती देताना जिल्हा प्रशासन विभागाकडून प्रवाशी नागरिक असा उल्लेख करण्यात येत होता. परंतु, हे प्रवाशी नागरिक म्हणजे नेमके कोण असा सवाल उपस्थित केला जात होता. त्यामुळे जिल्हा शल्यचिकित्सक डॉ. निळकंठ भोसीकर यांनी प्रवाशी नागरिक म्हणजे गुरुद्वारा परिसरातील यात्रेकरु नव्हे असे सांगितले आहे.

हेही वाचा - अनेक अहवाल प्रलंबित, लॅबमधील तांत्रिक अडचणीचे गौडबंगाल काय...?

ते इतर राज्यातील रहिवाशी 
दोन दिवसांपासून आढळून येत असलेल्या जिल्ह्यातील पॉझिटिव्ह रुग्णांची माहिती देताना प्रवाशी रुग्ण असा उल्लेख केला जात आहे. परंतु, हे प्रवाशी गुरुद्वारा परिसरातील यात्रेकरु नाहीत. तर ते इतर राज्यातील रहिवाशी आहेत. त्यामुळे गुरुद्वारा परिसरातील नागरिकांनी घाबरुन जाण्याची गरज नाही.

- डॉ. निळकंठ भोसीकर, जिल्हा शल्यचिकित्सक.