आरग : शेतजमिनीच्या बांधरस्त्याचा वाद इतका टोकाला गेला की, एका गर्भवतीला (Pregnant Women) रुग्णालयात दाखल करण्यासाठी रस्ता मिळाला नाही! एखाद्या आदिवासी पाड्याप्रमाणे तिला झोळीत टाकून न्यावे लागले. झाडाझुडपातून, ओढ्यातून वाट काढत ग्रामस्थांना रुग्णवाहिकेपर्यंत जावे लागले. माणुसकीला काळिमा लावणारा हा प्रकार येथील रेल्वे स्टेशन (Railway Station) रस्त्यावरील माळी मळ्यात घडला.

आरग येथील गावाबाहेर असणाऱ्या लोकवस्तीत असणाऱ्या कुटुंबीयांचा रस्ता वहिवाटीचा वाद अनेक वर्षांपासून सुरू आहे. सुमारे ४० एकरांच्या डागाचा हा प्रश्‍न आहे. संबंधित शेतकऱ्याने वहिवाटीत असणारा रस्ता बांध घालून बंद केला. त्यामुळे दोन्ही कुटुंबीयांचा वाद तहसीलदार तथा तालुका दंडाधिकारी यांच्या कोर्टात सुरू आहे. अनेकवेळा सुनावणी होऊनही रस्त्याचा निर्णय प्रलंबित आहे.

गेल्या दोन दिवसांपासून गर्भवती अस्वस्थच होती. आज तीव्र वेदना सुरू झाल्या. कुटुंबीयांनी रुग्णवाहिका बोलावली. तेव्हा माळी कुटुंबीयांनी मंडल अधिकाऱ्यांकडे धाव घेतली. गर्भवतीची सुटका करण्याची विनंती केली. तहसीलदारांशी चर्चा सुरू असताना इकडे प्रसूतिवेदना वाढत होत्या. शेवटी रस्ताच मिळत नसल्याने कुटुंबीयांनी ग्रामस्थांना मदतीसाठी बोलावले. सर्वांनी महिलेला झोळीत टाकून झाडाझुडपातून, ओढ्यातून वाट काढीत रुग्णवाहिकेपर्यंत नेले.

गेली दोन वर्षे हा वाद महसूल विभागाकडे प्रलंबित आहे. ऊस नेण्यापासून प्रत्येक वेळी या शेतकऱ्यांची अडवणूक होते. काही आठवड्यांपूर्वी त्यांच्या उसासाठी मंडल अधिकाऱ्यांनी मध्यस्थी करून तात्पुरता रस्ता उपलब्ध करून दिला होता. आज मात्र तशी मध्यस्थी होऊ शकली नाही.

‘स्थळ पाहणी पंचनामा झाला असून, याआधी पर्यायी रस्ता उपलब्ध करून देऊन शेतमाल बाहेर काढण्यात आला आहे. या कामी मंडल अधिकाऱ्यांना प्राधिकृत केले होते. सध्या याविषयची सुनावणी सुरू असून, लवकरच योग्य तो निर्णय होईल.’

-डॉ. अपर्णा मोरे-धुमाळ, तहसीलदार, मिरज