पारनेर : ज्येष्ठ समाजसेवक अण्णा हजारे यांच्या मौनाचा आज चौथा दिवस होता. पाठिंबा देण्यासाठी येणाऱ्यांची संख्या दिवसेंदिवस वाढत आहे. आज म्हसणे फाटा येथील श्री समर्थ शिक्षण संस्थेच्या पॉलिटेक्‍निक व इंग्रजी माध्यमाच्या मुलींनी राळेगणसिद्धी येथे जाऊन अण्णांच्या भूमिकेला पाठिंबा दिला. मुलींनी हजारे यांच्या समर्थनार्थ भाषणेही केली. त्यानंतर दिलेल्या घोषणांनी मंदिर परिसर दणाणून गेला होता. 

अवश्‍य वाचा - दारूड्या मुलाने केला वृद्ध वडिलांचा खून 

श्री समर्थ पॉलिटेक्‍निकच्या व इंग्रजी माध्यमातील मुली व शिक्षकांनी आज दुपारी बारा वाजण्याच्या सुमारास राळेगणसिद्धीत जाऊन अण्णांना पाठिंबा दिला. प्राचार्य शिल्पा गाडिलकर, डॉ. अरुणा भामरे व पॉलिटेक्‍निकच्या प्राचार्य श्रुती अंबाडे यांच्यासह शिक्षक उपस्थित होते. 

हेही वाचा - जिल्हा परिषदेतील महिलांवर "वाकडी नजर' 

मालेगाव येथील राष्ट्रीय पाठशाळेच्या मुलांनीही हजारे यांची भेट घेतली. काही समर्थक थेट राजस्थानातून आले होते. विदर्भातील पशुवैद्यकीय संघटनेच्या पदाधिकाऱ्यांनी राळेगणसिद्धीत अण्णांना भेटून पाठिंबा दिला. काल दिवसभरात पिंपळनेर, राळेगणसिद्धी येथील भजनी मंडळांनी यादवबाबा मंदिरात भजने सादर करून पाठिंबा दिला. 

निर्भया प्रकरणातील आरोपींना लवकरात लवकर फाशी द्यावी, महिलांवरील अत्याचाराच्या घटनेचा तपास तातडीने करावा आदी मागण्यांसाठी हजारे यांनी आंदोलन सुरू केले आहे. "माझी कोणाकडेही काही मागणी नाही. मौन कोणी व्यक्ती किंवा पक्षाच्या विरोधात नाही. महिलांवर होणारे अन्याय व अत्याचाराच्या विरोधात आहे. अन्याय व अत्याचाराविरोधात महिलांना लवकर न्याय मिळावा, यासाठी आहे,' असे निवेदन हजारे यांनी "सकाळ'कडे लेखी दिले.