कोगनोळी : कर्नाटक, महाराष्ट्रातील लाखो भाविकांचे श्रद्धास्थान असलेल्या आप्पाचीवाडी-कुर्ली येथील हालसिद्धनाथ देवाची यात्रा भक्तीमय वातावरण झाली. आज (ता. २५) पालखी मिरवणुकीने या यात्रेची सांगता झाली.

गुरुवारी सकाळी कुर्ली येथील हालसिद्धनाथ मंदिरात मानकरी, पुजारयांच्या उपस्थितीत आरती व विविध धार्मिक कार्यक्रम झाले. गावातील प्रमुख मार्गावरून पालखी मिरवणूक आप्पाचीवाडीत आणली. तेथे कुर्ली-आप्पाचीवाडी पालखी, अश्व, छत्री प्रमुख मार्गावरून खडक मंदिराजवळ आल्यावर मंदिर प्रदक्षिणा केली. यावेळी ढोल जागर, वालंग, हेडाम झाला. यावेळी मुख्य मूर्तीची प्रतिष्ठापना केली.

मंदिरात रोज सकाळी, सायंकाळी सात वाजता आरती केली. रोज रात्री वालंग, ढोल जागर पालखी मंदिर प्रदक्षिणा झाली. शनिवारी पहाटे भगवान ढोणे यांची पहिली भाकणूक झाली. रविवारी पहाटे या यात्रेची मुख्य भाकणूक झाली. प्रशासनाने यात्रा रद्द केल्याने कोणत्याही प्रकारची दुकाने लावली नव्हती.

यात्राकाळात निपाणी ग्रामीण पोलिस ठाण्याचे उपनिरीक्षक अनिल कुंभार यांच्या मार्गदर्शनाखाली पोलिस फौजफाटा तैनात केला होता.

सलग पाच दिवस कोल्हापूर येथील कल्लाप्पांण्णा पत्रावळे यांनी महाप्रसादाचे आयोजन केले होते. ग्रामपंचायतीकडून पिण्याच्या पाण्यासह इतर सुविधा उपलब्ध करून दिल्या होत्या.

सोमवारी सायंकाळी आप्पाचीवाडी-कुर्ली पालखी मंदिर प्रदक्षिणा करून वाडा मंदिराकडे व तेथून पालखी कुर्लीकडे रवाना झाली. कुर्ली येथील प्रमुख मार्गावरून पालखी मिरवणूक हालसिद्धनाथ मंदिरात आली. त्यानंतर पाच दिवस सुरू असलेल्या हालसिध्दनाथ यात्रेचे सांगता झाली.