बेळगाव : निष्पाप मराठी युवकांवर घालण्यात आलेले गुन्हे (Crime) मागे घ्यावेत अशी मागणी माजी नगरसेवक संघटनेच्यावतीने जिल्हाधिकाऱ्यांकडे निवेदनाद्वारे करण्यात आली आहे. तसेच गुन्हे नोंदविण्यात आलेल्या युवकांपैकी अनेकजण शिक्षण घेत असल्याने त्यांचे शैक्षणिक नुकसान होऊ नये याकडेही लक्ष देण्याची मागणी करण्यात आली आहे.

माजी मराठी नगरसेवकांतर्फे जिल्हाधिकाऱ्यांना सोमवारी निवेदन सादर करण्यात आले. बेळगाव शहर आणि परिसराची शांतता भंग करण्यासाठी काही समाजकंटकांनी महापुरुषांचा अपमान करण्यास सुरुवात केली. तसेच छत्रपती शिवाजी महाराजांच्या पुतळ्याची विटंबना करण्यात आल्याचे पडसाद शहर आणि परिसरात उमटले. तसेच महाराष्ट्र विधान सभा व इतर ठिकाणी देखील याबाबत निषेध नोंदविण्यात आला.

मात्र जे कार्यकर्ते सामाजिक कार्यात अग्रेसर होऊन काम करतात. ज्यांनी कोरोनाच्या लाटेमध्ये धोका पत्करुन जनतेची सेवा केली. अशा निष्पाप कार्यकर्त्यांवर खोटे गुन्हे दाखल करून जेलमध्ये घालण्यात आले आहे. तसेच या युवकांवर राज्यद्रोहाचा गुन्हा नोंदविण्यात आला आहे. त्यामुळे अनेकांच्या कुटुंबीयांना मोठा त्रास सहन करावा लागत असून काहीजण सिएचा अभ्यासक्रम शिकत आहेत. तर काहीजण महाविद्यालयिन शिक्षण घेत आहेत. याचा विचार करून महाराष्ट्र एकीकरण समितीचे शुभम शेळके, श्री राम सेनेचे रमाकांत कोंडूसकर यांच्यासह इतर कार्यकर्त्यांवरील गुन्हे मागे घेऊन त्यांची सुटका करावी अशी मागणी निवेदनाद्वारे करण्यात आली आहे.

शिरस्तेदार मंजू जानकी यांनी निवेदनानाचा स्वीकार केला. यावेळी माजी महापौर ऍड नागेश सातेरी, मालोजी अष्टेकर, शिवाजी सुंठकर, किरण सायनाक, महेश नाईक, माजी उप महापौर संजय शिंदे, माजी नगरसेवक मनोहर हलगेकर, विनायक गुंजटकर, राजू बिर्जे, दिनेश रावळ, राकेश पलंगे, विजय भोसले, सुधा भातकांडे, वैशाली हुलजी, प्रशांत भातकांडे, आर आय पाटील आदी उपस्थित होते.