सोलापूर ः सोलापूर जिल्हा परिषदेच्या विषय समित्यांच्या निवडी 14 जानेवारीला होणार आहेत. या निवडीमध्ये भाजपला स्थान देण्याची मागणी आज झालेल्या बैठकीत सदस्यांनी नेत्यांकडे केली आहे. आम्हाला पद नको, अशी भूमिका घेणाऱ्या भाजपच्या सदस्यांनीच आता पदाची मागणी केल्यामुळे जिल्हा परिषदेच्या विषय समिती निवडीमध्ये भाजप-समविचारी आघाडीचे गणित बिघडण्याची शक्‍यता वर्तविली जात आहे. 

हेही वाचा ः उद्धवसाहेब "या' खेकड्याच्या नांग्या वेळीच मोडा...कुठे लावलाय हा फलक चला पाहूया 

जिल्हा परिषदेच्या विषय समित्यांच्या निवडीच्या पार्श्‍वभूमीवर आज भाजप-समविचारी आघाडीच्या सदस्यांची बैठक झाली. या बैठकीत भाजपच्या सदस्यांनीही विषय समितीच्या सभापती पदाची मागणी माजी पालकमंत्री विजयकुमार देशमुख यांच्याकडे केली आहे. जिल्हा परिषद अध्यक्षाचा बंगला असलेल्या "नंदादीप'वर भाजप-समविचारी आघाडीच्या सदस्यांशी नेत्यांनी संवाद साधला. 

हेही वाचा ः सोलापूरच्या बंडखोरांची सुनावणी सोमवारी, सभापती निवडी मंगळवारी 

जिल्हा परिषदेच्या विषय समित्यांच्या निवडी 14 जानेवारीला होणार आहेत. त्यादृष्टीने आज झालेली बैठक महत्त्वाची ठरली आहे. या बैठकीला जवळपास 32-33 सदस्य उपस्थित असल्याची माहिती सूत्रांनी दिली. अध्यक्ष-उपाध्यक्ष निवडीत यश मिळविल्यानंतर आता भाजप-समविचारी आघाडीचे लक्ष विषय समित्यांच्या निवडीकडे लागले आहे. आज झालेल्या बैठकीत प्रत्येक तालुक्‍यातील जिल्हा परिषद सदस्यांशी समविचारीच्या नेत्यांनी संवाद साधला. त्या संवादावेळी भाजपने पदाची मागणी केली आहे. अध्यक्ष-उपाध्यक्ष निवडीच्यावेळी पदाची मागणी न करणाऱ्या भाजपने आता मागणी केल्यामुळे नेमके काय होणार याबाबत तर्क-वितर्क लढविले जात आहेत. 

आज झालेल्या बैठकीसाठी आमदार प्रशांत परिचारक, माजी खासदार रणजितसिंह मोहिते-पाटील, जिल्हा परिषदेचे अध्यक्ष अनिरुद्ध कांबळे, उपाध्यक्ष दिलीप चव्हाण, बांधकाम समितीचे सभापती विजयराज डोंगरे, पक्षनेते आनंद तानवडे, मदन दराडे यांच्यासह अनेक सदस्य उपस्थित होते. काही अडचणींममुळे आजच्या बैठकीसाठी आमदार राजेंद्र राऊत, दामाजी कारखान्याचे अध्यक्ष समाधान आवताडे गैरहजर राहिले. मात्र, या दोन्ही नेत्यांना मानणारे जिल्हा परिषद सदस्य आजच्या बैठकीला उपस्थित होते. बंद खोलीमध्ये प्रत्येक तालुक्‍यातील इच्छुकांशी नेत्यांनी चर्चा केली. सभापतिपद कोणत्या तालुक्‍याला द्यायचे याचा निर्णय निवडीदिवशीच घेतला जाण्याची शक्‍यता आहे. बैठकीनंतर सर्वांसाठी भोजनाची व्यवस्था करण्यात आली होती. 

राज्यात महाविकास पण सोलापुरात भाजप-समविचारी 
भाजपचे जिल्हा परिषदेत 13 सदस्य आहेत. विषय समितीच्या चार सभापतींची निवड करायची आहे. त्यामुळे या चारपैकी दोन सभापतीपद भाजपकडे देण्याची मागणी काही सदस्यांनी नेत्यांकडे केली आहे. भाजपला दोन समित्या देताना त्या कोणत्या तालुक्‍याला द्यायच्या याचाही निर्णय नेत्यांनीच घ्यायचा आहे. राज्यात महाविकास आघाडीची सत्ता असतानाही जिल्हा परिषदेच्या अध्यक्ष-उपाध्यक्षपदी भाजप-समविचारी आघाडीच्या उमेदवारांना विजयी केल्याबद्दल सर्वांनी नेत्यांचे आभार मानले.