नगर : ""जिल्हा परिषदेच्या अध्यक्ष, उपाध्यक्षपदाच्या निवडणुकीत भारतीय जनता पक्ष उतरणारच आहे. उमेदवार मात्र मंगळवारी (ता. 31) जाहीर करणार आहोत,'' अशी माहिती भाजपचे नेते आमदार राधाकृष्ण विखे पाटील यांनी दिली. जिल्हा परिषदेच्या अध्यक्षपदाच्या निवडीबाबत आज भाजपच्या कोअर कमिटीची बैठक झाली. त्यानंतर विखे पत्रकारांशी बोलत होते. प्रा. बेरड यांनी बैठकीतील माहिती सांगताना जिल्हा परिषदेच्या निवडीबाबत सर्वाधिकार विखे पाटील व राम शिंदे यांना दिल्याचे सांगितले. 

हे पाहा पंढरपूरला जाणाऱ्या भाविकांवर काळाचा घाला 
 

आमदार मोनिका राजळे, माजी मंत्री राम शिंदे, माजी आमदार शिवाजी कर्डिले, जिल्हाध्यक्ष प्रा. भानुदास बेरड उपस्थित होते. विखे पाटील म्हणाले, ""जिल्हा परिषदेच्या अध्यक्षपदाच्या निवडीबाबत मुंबईतील बैठकीत पक्षश्रेष्ठींशी चर्चा झाली. आज कोअर कमिटीच्या बैठकीतही निवडणूक लढविण्याबाबत सर्वांचे एकमत झाले आहे. त्यामुळे जिल्हा परिषदेमध्ये अल्पमतात असला, तरी पक्ष उमेदवार देणार आहे. उमेदवार कोण असेल, हे मात्र आता सांगता येणार नाही. ते निवडीच्या वेळी 31 तारखेला जाहीर करू.'' 

हेही वाचा इथं होतोय बेसुमार वाळूउपसा 
 

जिल्हा परिषदेत भाजपचे सध्या 13 सदस्य आहेत. बहुमताला 37 सदस्य आवश्‍यक आहेत. अशा परिस्थितीत काय करणार, याबाबत विखे पाटील म्हणाले, ""राजकारणात केव्हा काय होईल, ते सांगता येत नाही. आम्ही राज्यात बहुमतात असूनही सत्तेत येऊ शकलो नाही. जिल्हा परिषदेत बहुमत नसले, तरी त्यासाठी आम्ही भाजपचे सर्व नेते प्रयत्न करीत आहोत.'' 

शिवसेना सदस्यांची मुंबईत खलबते 

जिल्हा परिषद पदाधिकारी निवडणुकीत महाविकास आघाडीसोबतच राहण्याचा निर्णय शिवसेनेने घेतला आहे. त्यावर चर्चा करण्यासाठी आज पक्षाचे जिल्हा परिषद सदस्य व जिल्हाप्रमुख शशिकांत गाडे यांनी मुंबईत शिवसेना नेते अनिल देसाई यांची भेट घेतली. पक्षाचे संपर्कप्रमुख भाऊ कोरगावकर यांच्यासह संदेश कार्ले, अनिल कराळे, काशिनाथ दाते, सुषमा दराडे, गोविंद मोकाटे यांनी नेत्यांकडे त्याबाबत भूमिका मांडली. सत्तेत किमान उपाध्यक्ष व एक समिती मिळावी, अशी भूमिका जिल्हाप्रमुख व सदस्यांनी मांडली. तथापि, नेत्यांनी वरिष्ठ पातळीवर घेतलेले निर्णय आम्हाला मान्य असतील, अशी भूमिकाही मांडल्याचे संदेश कार्ले यांनी "सकाळ'ला सांगितले. 

येथे क्‍लिक करा सहलीला कमी पैसे दिले म्हणून...