बेळगाव - कोरोनाच्या पार्श्‍वभूमीवर लागू करण्यात आलेल्या टाळेबंदीच्या काळात शासकीय सुविधांबाबत सत्ताधारी गटाच्या आमदारांनीच आंदोलन केल्याची घटना बेळगावात घडली आहे. बेळगाव दक्षिणचे आमदार अभय पाटील यांनी रविवारी सायंकाळी शहापूर येथील बॅ. नाथ पै चौकात आपल्या कार्यकर्त्यांसह एक तास आंदोलन केले. टाळेबंदीच्या काळात नागरिकांना मोफत दूध वाटप करण्याचा निर्णय शासनाने घेतला आहे. त्यानुसार दुधाचे वाटपही करण्यात येत आहे. पण या दूध वाटपात पक्षपात होत असल्याचा आमदार पाटील यांचा आरोप आहे. त्यामुळेच त्यानी बॅ. नाथ पै चौकात आंदोलन करून प्रशासनाचे लक्ष याकडे वेधले आहे.
हे आंदोलन करताना आमदार पाटील व त्यांच्या कार्यकर्त्यांनी सोशल डिस्टन्सींगच्या तत्वाचे पालन केले. पण आमदारांनीच आंदोलन सुरू केल्यामुळे पोलिस यंत्रणेची धावपळ सुरू झाली. आंदोलन स्थळापासून शहापूर पोलिस ठाणे हाकेच्या अंतरावर आहे. त्यामुळे आंदोलनाची दखल घेत शहापूरचे पोलिस निरीक्षक व त्यांच्या सहकाऱ्यांना आंदोलनस्थळी जावे लागले. आमदार पाटील हे भारतीय जनता पक्षाचे आमदार आहेत. सध्या राज्यात भाजपची सत्ता आहे. टाळेबंदीच्या काळात दूधवाटप करण्याचा निर्णय मुख्यमंत्री बी. एस. येडीयुराप्पा यांनीच घेतला आहे. त्या निर्णयाचा भाग म्हणून आमदार अभय पाटील यांनी स्वतः कार्यकर्त्यांसह आपल्या मतदारसंघात दुधाच्या पाकीटांचे वाटप केले आहे. बेळगाव उत्तरचे आमदार अनिल बेनके यांनीही दुधाच्या पाकीटांचे वाटप केले आहे. पण आमदार पाटील यांच्या मते प्रशासनाकडून दूध वाटप योग्य पद्धतीने केले जात नाही. दूध वाटपाची जबाबदारी प्रशासनाची आहे, पण हे दूध गरजूंना मिळतच नाही अशी त्यांची तक्रार आहे. दूध वाटपासाठी गेल्यानंतर वितरकांकडून किंवा मोजक्‍यांकडूनच त्यावर डल्ला मारला जात असल्याचा प्रकार काही दिवासंपूर्वी घडला होता. शिवाय शहराच्या काही भागात दूध वाटप योग्य पद्धतीने होत आहे तर काही भागात होत नसल्याची नागरिकांची तक्रार आहे. यासंदर्भात आमदार पाटील यांनी जिल्हाधिकाऱ्यांशी चर्चा करणे अपेक्षीत होते. पण टाळेबंदीच्या काळात त्यांनी आंदोलनाचा मार्ग निवडला. सत्ताधारी आमदार असूनही शासनाच्या विरोधात बोलण्याचे धाडस याआधीही आमदार पाटील यांनी दाखविले आहे. नगरविकासमंत्री बैराती बसवराज यांच्या बेळगावातील आढावा बैठकीत त्यांनी नगरविकास खात्याच्या अधिकाऱ्यांवर थेट हल्लाबोल केला होता. आता ते थेट प्रशासनाच्या विरोधात रस्त्यावर उतरले आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.