सोलापूर : आंबा... लहान-थोर साऱ्यांनाच आवडणारा. पाहताच क्षणी तोंडाला पाणी आणणारे हे फळ. रविवारी श्रीमंतयोगी युवक प्रतिष्ठानने वंचितांच्या शाळेत आंबे खाण्याची स्पर्धा घेऊन आगळ्या वेगळ्या पद्धतीने सामाजिक बांधिलकी जोपासली. शाळेतील चिमुकल्यांनी आंब्यावर मस्त ताव मारून तृप्तीची ढेकर दिली. 

प्रार्थना फाउंडेशन संचलित वंचितांच्या शाळेतील 40 विद्यार्थ्यांनी या अभिनव स्पर्धेत सहभाग नोंदविला. स्पर्धा जिंकण्याच्या चढाओढीने चिमुकल्यांनी आंब्यावर मस्त ताव मारला. लहान व मोठा गट अशा दोन गटांमध्ये ही स्पर्धा घेण्यात आली. विजेत्या स्पर्धकांना वह्या, कंपास, शालेय साहित्य बक्षीस स्वरूपात देण्यात आले. याप्रसंगी मागास सेवा मंडळाचे सचिव सुभाष चव्हाण, प्रतिष्ठानचे सल्लागार नितीन करवा, वंचितांच्या शाळेचे प्रमुख प्रसाद मोहिते, अनु मोहिते, श्रीमंतयोगी प्रतिष्ठानचे संस्थापक महेश कासट, प्रशांत हिबारे, कल्पना चव्हाण, साहेबराव परबत, शुभम हंचाटे, शुभम कासट, मल्लिकार्जुन आष्टगी, संजय गवडी आदी उपस्थित होते. मयूर गवते यांनी सूत्रसंचालन केले. मल्लिकार्जुन यणपे यांनी आभार मानले. 

मुलांच्या चेहऱ्यावर आनंद दिसून येत होता. उपेक्षित, वंचित मुलांना आंबे खायला मिळत नाहीत. त्यांना आंब्याचा आस्वाद घेता यावा या उद्देशाने अक्षय तृतीयेच्या निमित्ताने ही स्पर्धा घेतली. मुलांचा आनंद पाहून समाधान वाटले, असे मत श्रीमंतयोगी प्रतिष्ठानचे संस्थापक महेश कासट यांनी व्यक्त केले.