अकोले : तालुक्‍यातील घरकुलांची कामे सुरू असतानाच कोरोनाचे संकट आले. त्यामुळे सर्व कामे जैसे थे राहिली आहेत. भंडारदरा पाणलोटक्षेत्रातील 12 गावे, वाडी-वस्तीत 50हून अधिक घरांची कामे अर्धवट आहेत. दुसरा हप्ता मिळाला नि कामे थांबली. ही कामे पुन्हा सुरू करण्याची मागणी होत आहे. आदिवासी लोक घराशेजारी झोपडी बांधून किंवा झाडांच्या सावलीत दिवस काढत आहेत. उडदावणे, पांजरे, मुरशेत, साम्रद, शिंगणवाडी येथे हे चित्र दिसते. 

पंचायत समिती अंतर्गत स्थानिक ग्रामपंचायतीने दारिद्य्ररेषेखालील कुटुंबांना घरकुलांचा लाभ दिला. मार्चमध्ये त्यांना दुसरा हप्ता मिळाला असून, तत्पूर्वीच जुने घर पाडून नवीन बांधकाम आदिवासी लाभार्थींनी सुरू केले होते. घराशेजारी तात्पुरती झोपडी बांधून त्यात हे लोक राहत आहेत. मात्र, अचानक कोरोनाचे संकट आले नि कामे थांबली. घराचे स्वप्न उराशी बाळगून आदिवासी लोक झोपडीत दिवस कंठत आहेत. त्यात हाताला काम नाही, खायला घास नाही. जंगलात मिळेल, त्यावर कशीतरी त्यांची गुजराण सुरू आहे. 

हेही वाचा - रात्रं दिन आम्हा युद्धाचा प्रसंग, भावांचे कोरोनाशी दोन हात

कडक उन्हाळ्यामुळे सकाळीच पाण्याच्या शोधात ही माणसे निघतात. दुपारी शेतात राब जाळण्याचे काम चालते. या परिसरात किमान 75 घरकुलांची कामे अपूर्णावस्थेत आहेत. उडदावणे येथील वृद्ध रामा लोटे घराचे काम अपूर्ण असल्याने झाडाखाली बसले होते. दोन हप्ते मिळाले, सरकार तिसरा हप्ता देत नाही, तोपर्यंत घर झाकले जाणार नाही. त्यात पाऊस आला, तर मग कुठे तरी आडोशाला राहावे लागेल, असे ते सांगत होते. 

घरकुलाच्या अर्धवट कामामुळे आदिवासी लोक झोपडीत किंवा झाडाखाली राहतात. संबंधित विभागाने घरकुलांचा निधी तातडीने उपलब्ध करून दिल्यास या लोकांना बेघर जिणे जगावे लागणार नाही. 
- विनायक वाडेकर, सामाजिक कार्यकर्ते