श्रीगोंदे  : तालुक्‍यातील पेडगाव विविध कार्यकारी सहकारी सेवा संस्थेत 1 एप्रिल 2018 ते 31 मार्च 2019 दरम्यान दोन कोटी तेवीस लाख 41 हजार 699 रुपयांच्या रकमेचा अपहार झाल्याचे चौकशीत समोर आले आहे.

या प्रकरणी द्वारकानाथ राजहंस यांच्या फिर्यादीवरून संस्थेचे तत्कालीन सचिव व एक कर्मचारी अशा दोघांविरुद्ध श्रीगोंदे पोलिसांनी गुन्हा दाखल केला आहे. सुभाष हौसराव दळवी (अजनूज) व ईश्वर पंढरीनाथ गोधडे (पेडगाव) या संस्थेच्या तत्कालीन सचिव व लोकल कर्मचाऱ्यास या प्रकरणात आरोपी करण्यात आले आहे. 

अशी अाहे फिर्याद 

राजहंस यांनी दिलेल्या फिर्यादीत म्हटले आहे, की वरील दोघेही पेडगाव सहकारी संस्थेत सचिव व कर्मचारी म्हणून नोकरीस असताना त्यांनी वरील कालावधीत त्यांच्या पदाचा व अधिकाराचा दुरुपयोग करून संगनमताने संस्थेच्या मालकीच्या दोन कोटी 23 लाख 41 हजार 699 रुपये रकमेचा अपहार करून फौजदारी पात्र न्यासभंग करून संस्थेचे सभासद, संचालक, बॅंक, लेखापरीक्षक यांचा विश्वासघात करून फसवणूक केली. 

पाेलिस अधीक्षकांना त्रव्यवहार

सध्या हा तपास पोलिस निरीक्षक दौलतराव जाधव करीत आहेत. पुढील तपास आर्थिक गुन्हे शाखेमार्फत करण्यासाठी पोलिस अधीक्षकांना पत्रव्यवहार करण्यात आला आहे.