सोलापूर : बनावट स्वाक्षरीने सुमारे दोन कोटी रुपयांचा गैरव्यवहार झाल्याचा आरोप महापालिकेच्या शनिवारी झालेल्या सभेत करण्यात आला आणि भ्रष्टाचाराचा आणखीन एक नवीन प्रकार उघडकीस आला. आनंद चंदनशिवे व चेतन नरोटे यांनी केलेल्या या आरोपामुळे एकच खळबळ उडाली.

हेही वाचा - महापौर, उपमहापौरांनी राजीनामे द्यावेत 

कुंपणच खाई शेत त्याला नाही लाज
भ्रष्टाचार झाला आहे की नाही हे तपासणीअंती स्पष्ट होईलच. मात्र हा प्रकार करणारे आणि त्यांच्याकडून करून घेणारे दोघेही महापालिकेचे विश्वस्तच आहे. एक लोकनियुक्त तर एक प्रशासन नियुक्त. त्यामुळे कुंपणच खाई शेत त्याला नाही लाज, घरचाच रखवाला वैरी झाला आज याचा अनुभव सभागृहात उपस्थितांना आला. 

हेही अवश्य वाचा - असा असावा प्रशासन प्रमुख 

भ्रष्टाचाराची कीड
केंद्र शासनाच्या स्मार्ट सिटी योजनेत पहिल्या यादीत समावेश झालेल्या सोलापूर महापालिकेतील कारभाराला भ्रष्टाचाराची कीड लागली आहे. भ्रष्टाचाराचा हा पहिलाच प्रकार नाही. खूप प्रकार उघडकीस आले मात्र सक्षम निर्णय घेणारा अधिकारी न लाभल्याने भ्रष्टाचार करणारे मुक्तपणे कार्यरत आहेत. दहा - बारा रुपयांचा भ्रष्टाचार सिद्ध झाला की त्याला निलंबित करणारे प्रशासन टेबलाखालून लाखोंनी घेणारे, आप्तस्वकीयांची सोय करणाऱ्यांकडेे मात्र पूर्णतः दुर्लक्ष करते. महापालिकेतील अनेक प्रकरणे माध्यमांनी उघडकीस आणली पण समिती नियुक्त करणे इथंपर्यंतच प्रशासनाचे काम राहिले.  

कासवगतीने होतोयं हिशेब क्लिअर
विविध कामांसाठी घेतलेल्या उचल रकमेचा हिशेब देण्यासाठी आता चढाअोढ लागली आहे. मात्र कोट्यवधींची उचल करून फक्त लाखो रुपयांच्या पावत्या दाखल केल्या जात आहेत. सुमारे 116 कोटी रुपयांचा हिशेब न मिळाल्याचा प्रकार उघडकीस आल्याने महापालिकेच्या सभेत सर्वच सदस्यांनी अधिकाऱ्यांना धारेवर धरले. उचल घेतलेल्या रकमेचा हिशेब वेळेत न देणे हाही एक प्रकारचा भ्रष्टाचारच आहे, मात्र त्याकडेही दुर्लक्ष झाल्याचे दिसून येते.