अकलूज : शिवसेना नेते डॉ. धवलसिंह मोहिते-पाटील यांनी बुधवारी (दि. २०) शरद पवार यांच्यासह राष्ट्रवादी कॉग्रेसच्या नेते मंडळींची भेट घेतली. या भेटीनंतर राष्ट्रवादी कॉग्रेसमधील त्यांच्या प्रवेशाची शक्यता बळावली आहे. दरम्यान आज दुपारी तीन वाजता त्यांनी आपल्या समर्थकांची बैठक बोलावली असून यावेळी ते आपली राजकीय भुमिका स्पष्ट करतील अशी अपेक्षा आहे.

माजी खासदार रणजितसिंह मोहिते-पाटील यांनी बुधवारी भाजपमध्ये प्रवेश केल्यानंतर त्याचदिवशी धवलसिंहांनी राष्ट्रवादी कॉग्रेसच्या नेते मंडळींची भेट घेतली आहे. विधान परिषदेचे विरोधी पक्षनेते धनंजय मुंडे यांच्या मुंबई येथील निवास्थानी पार पडलेल्या या बैठकीला श्री पवार यांच्यासह राष्ट्रवादीचे प्रदेशाध्यक्ष जयंत पाटील, माजी उपमुख्यमंत्री अजित पवार हे देखील उपस्थित होते. माजी खासदार रणजीतसिंह पाटील यांनी भाजपमध्ये प्रवेश केल्यानंतर लगेचच सायंकाळी धवलसिंह यांनी राष्ट्रवादीच्या नेत्यांची भेट घेतल्याने राजकीय तर्कवितर्कांना उधान आले आहे. त्यातच शिवसेनेच्या जिल्हा सहसंपर्क प्रमुख पदाचा त्यांनी राजीनामा दिल्याचे सांगितले जात आहे. त्यामुळे त्यांच्या राष्ट्रवादी काँग्रेस मधील प्रवेशाची शक्यता व्यक्त होत आहे.

आज दुपारी तीन वाजता 'प्रतापगड' या निवासस्थानी त्यांनी जनसेवा संघटनेचे पदाधिकारी, कार्यकर्ते व हितचिंतकांची बैठक बोलावली आहे. या बैठकीत ते कार्यकर्त्यांची मते जाणून घेणार आहेत. या बैठकीनंतर ते आपला राजकीय निर्णय जाहीर करतील अशी अपेक्षा आहे.