बेळगाव - लढण्याचा हक्क आहे, हक्कांसाठी लढतोय, तुमच्याकडे कायदा आणि शस्त्र आहे. त्यामुळे मुस्कटदाबी करण्याचा प्रयत्न अनेक वर्षांपासून सुरू आहे. मात्र, आमच्या मनात लढण्याची इच्छा आहे, तोपर्यंत लढा सुरूच राहणार आहे. आजही हुकूमशाही आणि दंडूकशाहीला झेलण्याची ताकद येथील मराठी माणसाच्या निधड्या छातीत आहे. मराठी माणूस कोणत्याही दडपशाहीला घाबरणार नाही, असे प्रतिपादन सीमालढ्यातील अग्रणी नेते प्रा. डॉ. एन. डी. पाटील यांनी केले.

येथील व्हॅक्‍सीन डेपो मैदानावर महाराष्ट्र एकीकरण समितीच्या महामेळाव्यात अध्यक्षीय भाषणात प्रा. डॉ. एन. डी. पाटील बोलत होते. शिवसेना कोल्हापूर जिल्हा प्रमुख विजय देवणे यांच्यासह सीमाभागातील महाराष्ट्र एकीकरण समितीचे नेते आणि आमदार उपस्थित होते. पाटील म्हणाले, अनेक वर्षांचा लढा असून जनतेचा विजय होऊ नये हे कोणी नाकारू शकत नाही. कर्नाटक सरकारचे आणि पोलिसांचे अनेक अत्याचार, छळ मराठी माणसाने पचविले आहेत. लोकशाहीवर देश चालतो आहे. या ठिकाणी हुकूमशाही करता येणार नाही. सरकारला लोकशाहीची लाज असेल तर अन्याय करू नये. सडक्‍या मनोवृत्तीने सरकार चालवून काही यशस्वी होणार नाही. उलट दिवाळखोरीत निघणार आहे. याचा विचार कर्नाटक सरकारने केला पाहिजे.''

या वेळी आमदार संभाजी पाटील, आमदार अरविंद पाटील, माजी आमदार मनोहर किणेकर, माजी आमदार दिगंबर पाटील, शहर अध्यक्ष दीपक दळवी, बेळगाव तालुका अध्यक्ष निंगोजी हुद्दार, सरचिटणीस मालोजी अष्टेकर, प्रकाश मरगाळे आदी व्यासपीठावर उपस्थित होते. महामेळाव्याला सीमाभागातील लोक मोठ्या संख्येने उपस्थित होते.