चिक्कोडी - जिल्ह्यात भारतीय जनता पक्ष सरकार सत्तेवर आल्यानंतर दोन मराठीद्वेष्ट्या मंत्र्यांची नियुक्ती झाली. जिल्हा पालकमंत्री वेगळे असले तरी जिल्ह्यातील मराठी प्रभाव खोडून काढण्यासाठी जिल्ह्यातीलच दोन्ही मंत्री पेटून उठले आहेत. मराठी भाषकांच्या बळावर निवडून आल्याचा विसर पडून मराठी भाषकांचा हक्क हिरावण्याचे काम सुरू आहे.
निपाणी मतदारसंघातील बहुतांश मराठी मतांवर विजयी झालेल्या व राज्याच्या मंत्री बनलेल्या शशिकला जोल्ले यांनी निपाणी भागातील नागरिकांनी कन्नड भाषा शिकावी, असा सल्ला दिला होता. उपमुख्यमंत्री लक्ष्मण सवदी हे कायमच मराठी विरोधी राहिले आहेत. बोरगाव येथे एका मराठी शाळेच्या उद्‌घाटनप्रसंगी त्यांनी मराठीऐवजी कन्नड शाळा सुरु करण्याचा अनाहूत सल्ला रावसाहेब पाटील यांना दिला होता.निपाणीत यापूर्वी मराठीशी जवळीक असलेला आमदार निवडून येत असे.
निवडणुकीत विजयासाठी मराठीत भाषण करणे, मराठी भाषकांवर प्रभाव पाडण्यासाठी महाराष्ट्रातील मराठी नेत्यांना आणणारे नेते आता आपल्या अधिकाराचा मराठीच्या ऱ्हासासाठी वापर करीत आहेत, हे स्पष्ट होत आहे.
यापूर्वी मंत्रीपद उपभोगलेल्या मंत्र्यांनी कधीही मराठीची गळचेपी करण्याचे धोरण अवलंबलेले नाही. मराठी भाषकही आपलेच असल्याने त्यांच्या कामात आडकाठी न आणता हक्कांचे संरक्षण केले. पण आता जिल्ह्यातील दोन्ही मंत्रीपदे मराठीद्वेष्ट्या नेत्यांच्या हाती असल्याने त्यांनी जिल्ह्यातीलच मराठीचे प्राबल्य कमी करण्यासाठी शासकीय यंत्रणा वेठीस धरली असल्याचे दिसून येत आहे.निपाणीत अलीकडे कन्नड कार्यक्रमांची रेलचेल वाढली आहे. मराठी भाषिकांचा त्याला फारसा प्रतिसाद नसला तरी बाहेरुन प्रेक्षक आणून कार्यक्रम यशस्वी करण्याचा खटाटोप सुरू आहे.
मराठी फलक खुपतात
मराठी साहित्य संमेलन यशस्वी होत असल्याचे पाहून मठाधीशांच्या पुढाकाराने व काही युवकांच्या प्रयत्नाने कारदगा येथे काही वर्षांपासून कन्नड साहित्य संमेलन भरविण्यात येत आहे. कन्नड साहित्य संमेलनात सहभागी होणाऱ्या संमेलनाध्यक्ष व अतिथींना येथील मराठी भाषेतील फलक डोळ्यांत खुपतात. राजकीय नेते व अधिकारी या भागात कानडी वरवंटा फिरविण्याची सूचना देऊन जात आहेत. कारदगा साहित्य संमेलनाला भाषा बांधव्य संमेलन म्हणून संबोधण्यात येत असले तरी मराठीचे प्राबल्य कमी करण्यासाठी त्याचा वापर होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.