निपाणी  :  सतत महिनाभराच्या लाॅकडाऊनमुळे येथील नगरपालिकेचे अर्थकारण विस्कळीत झाले आहे. दरवर्षी मार्चनंतर एप्रिल महिन्यात पालिकेच्या तिजोरीत ८० लाख रुपये घरफाळा जमा व्हायचा. पण आता लाॅकडाऊनमुळे कर वसुली थांबून पालिकेचे उत्पन्न ठप्प झाले आहे.

निपाणी पालिकेचे कररूपाने मिळणारे जवळपास तीन कोटी रुपयांचे वार्षिक उत्पन्न आहे. त्यात घरफाळा, दुकान गाळे भाडे, व्यापारी परवाने नूतनीकरण शुल्क यासह विविध विभागांचा समावेश आहे. घरफाळा हे पालिका उत्पन्नाचे मुख्य स्त्रोत आहे. दोन कोटीवर घरफाळा पालिकेत वसूल होतो. दरवर्षी मार्चनंतर एप्रिल महिन्यात घरफाळ्यात पाच टक्के सूट असते. त्यामुळे एप्रिलमध्ये फाळा भरण्यास पालिकेत गर्दी असते. पण यंदा लॉकडाऊनमुळे एप्रिलमधील कर वसुली ठप्प झाली आहे.

हेही वाचा- का केली जाते पावसाळ्या पूर्वी जोतिबा मंदिराच्या शिखरांची रंगरंगोटी?                        

निपाणी पालिकेचे उत्पन्न थांबले

खरेतर घरफाळा वसुलीला याच महिन्यात नागरिकांचा चांगला प्रतिसाद असताे. पण यंदा तसे घडलेले नाही. दुकान गाळे भाडे, व्यापारी परवाना शुल्क वसुलीही थांबली आहे. यावर्षी लाॅकडाऊनमुळे शासनाने फाळ्याच्या पाच टक्के सूट सवलतीस मे अखेरपर्यंत मुदतवाढ दिली आहे. पण लॉकडाऊन अजून किती दिवस असणार याच्या अनिश्चिततेमुळे मे महिन्यात देखील फाळा भरण्यास किती लोकांचा प्रतिसाद मिळतो याबद्दल शंका आहे. एकूणच लाॅकडाऊनचा पालिका अर्थकारणावर परिणाम झाला आहे.

हेही वाचा- कोरोना विरुद्ध लढ्यात थर्मल स्क्रिनिंगचे हत्यार!

 सवलतीत कर भरणा शक्य 
२४ मार्चपासून लाॅकडाऊन जारी झाल्याने गतवर्षीची वसुली पूर्ण करतानाही प्रशासनाला अडथळे आले आहेत. सुमारे दोन कोटी ७२ लाख रुपयांचा महसूल वसुलीचे उद्दिष्ट प्रशासनाने ठेवले होते. ९० वसुली नंतर लॉकडाऊन जारी झाल्याने अखेरच्या टप्प्यातील वसुली थकली आहे. पालिकेत महसूल विभाग सुरू असून इच्छुक लोक पाच टक्के सवलतीसह घरफाळा भरू शकतात, असे अधिकाऱ्यांनी सांगितले.