सोलापूर : मिळकतकराची सुमारे सव्वातीन लाख रुपयांची थकबाकी असलेल्या माजी नगरसेवकासह तब्बल 104 जणांचे नळजोड महापालिकेच्या कर संकलन विभागाने आजअखेर तोडले. दरम्यान, थकबाकी वसुलीदरम्यान राजकीय हस्तक्षेप वाढल्याने कर्मचाऱ्यांना मनस्ताप सहन करावा लागत आहे. मिळकतकराच्या थकबाकीवर लागलेल्या दंडात तब्बल 75 टक्के सवलत देण्याचा निर्णय आयुक्तांनी घेतला व त्यानुसार वसुलीही सुरू केली. त्यामुळे थकबाकी मोठ्या प्रमाणात वसूल होईल असे अपेक्षित होते. मात्र आजी-माजी नगरसेवकांचा हस्तक्षेप वाढला आहे. 

संधी - एसटी प्रवर्गातील उमेदवारांना नोकरीची संधी

50 हजार 594 जणांचा दंड होणार 75 टक्के माफ 
स्मार्ट सिटी योजनेत पहिल्या यादीत समावेश झालेल्या सोलापूर शहरातील तब्बल 50 हजार थकबाकीदारांना त्यांना झालेल्या दंडात 75 टक्‍क्‍यांची सवलत मिळणार आहे. या संदर्भातील आदेश आयुक्त तावरे यांनी गेल्या जारी केले. मिळकतकराची थकबाकी असेल तर दरमहा दोन टक्के दंड लावण्याची तरतूद राज्य शासनाने केली आहे. सोलापूर शहरातील गावठाण भागात 93 हजार 822 मिळकतदार आहेत. त्यापैकी 43 हजार 228 मिळकतदारांनी नियमित बिल भरले आहे. तर 50 हजार 594 मिळकतदारांना दोन टक्के दंड झाला आहे. ही थकबाकी 58 कोटी 94 लाख 72 हजार 183 इतकी आहे. या रकमेपैकी 75 टक्के दंडाची रक्कम ही माफ केली जाणार आहे. मात्र त्यासाठी 29 फेब्रुवारीपर्यंत संबंधित मिळकतदाराने त्याच्याकडील सर्व थकबाकी एकवट भरणे आवश्‍यक आहे. 

हेही वाचा - या महापालिकेत खरोखरच आंधळ दळतयं...

नोटीस व वॉरंट फीही पूर्णपणे माफ
दंडाच्या रकमेत 75 टक्के माफ करण्याबरोबरच नोटीस व वॉरंट फीही पूर्णपणे माफ केली जाणार आहे. शहर व हद्दवाढ भागातील मिळकतदारांकडे 3.81 कोटींची वॉरंट फी आणि 1.72 कोटींची नोटीस फी थकीत आहे. ही सर्व माफ होणार आहे. हद्दवाढ भागातील मिळकतदारांना आतापर्यंत 42 कोटींचा दंड झाला आहे. त्यापैकी 75 टक्के रक्कम आता माफ होणार आहे. शहर व हद्दवाढ मिळून एकूण दंडाची रक्कम सुमारे 100 कोटींची थकबाकी आहे. त्यापैकी जवळपास 75 कोटींचा दंड माफ होण्याची शक्‍यता आहे. शहर विभागात मार्चअखेरपर्यंत 228 कोटी रुपयांच्या वसुलीचे उद्दिष्ट आहे. 32 पेठांतील मिळकतदारांकडे 168 कोटी रुपयांची थकबाकी आणि चालू वर्षातील 60 कोटी रुपयांचा कर आहे. येत्या मार्चअखेर ही रक्कम वसूल करण्याचे उद्दिष्ट आहे.