खानापूर : मेजवणी आटोपून हुबळीहून घरी परतलेल्या बंकी (ता. खानापूर) येथील ११ जणांना अन्नातून विषबाधा झाली होती. त्यापैकी तुषार महंमद जमादार (वय १३) या लहान मुलाचा उपचारा दरम्यान रक्तरी जिल्हा शासकीय इस्पितळात मृत्यू झाला आहे. या घटनेमुळे गाव परिसरातून हळहळ व्यक्त होत आहे.

बेकवाड ग्रा. प हद्दीत येणाऱ्या बंकी गावातील अब्दुल जमादार यांचे अकरा जणांचे कुटुंब मंगळवारी एम. के. हुबळी येथे पाहुण्यांकडे जेवणासाठी गेले होते. ते सायंकाळी घरी परतले असता जेवून आलेल्यांच्या पोटात दुखू लागले. अत्यंत वेदना होऊ लागल्याने यातील त्याची पत्नी नावाजबी, मुले महमद, सारफराज, शयनज, नातवंडे शिबरन, साहि, सहना, जुहूर, आली, अजाण आदींची प्रकृती अत्यवस्थ झाली. दरम्यान, त्यांच्यावर नंदगड येथील प्राथमिक आरोग्य केंद्रात उपचार सुरू होते. बुधवारी रात्री तुषार याची प्रकृती खालावल्याने त्याला अधिक उपचारासाठी बेळगाव येथील जिल्हा शासकीय रुग्णायालत दाखल करण्यात आले होते. दरम्यान त्याचा मृत्यू झाल्याने हळहळ व्यक्त होत आहे. याप्रकरणी नंदगड पोलिसांत याची नोंद झाली आहे. तालुका आरोग्यधिकारी डॉ. संजीव नांदरे इतर रुग्णांवर उपचार करत आहेत.