सोलापूर : मध्य रेल्वेच्या सोलापूर विभागातील फुकट्या प्रवाशांकडून जानेवारी ते डिसेंबर 2019 या कालावधीत तब्बल 155 कोटी 14 लाखांचा दंड वसूल करण्यात आला आहे. सोलापूर विभागातून जाणाऱ्या मेल एक्‍स्प्रेसने प्रवास करणाऱ्या फुकट्या प्रवाशांचा मोठा सहभाग आहे. 

हेही आवश्‍य वाचाच : मेगाभरतीला अडथळा...कशाचा ते जाणून घ्या 

2018 च्या तुलनेत दंडाची रक्‍कम 12 कोटी 20 लाख रुपयांनी वाढली आहे. डिसेंबर महिन्यात दोन लाख 33 हजार फुकट्या प्रवाशांवर दंडात्मक कारवाई करण्यात आली. तर 2019 या वर्षात 29 लाख 89 हजार प्रवाशांवर कारवाई करीत हा दंड वसूल करण्यात आल्याची माहिती रेल्वे प्रशासनाने दिली. व्यक्‍ती व त्यांच्याकडील साहित्याचे तिकीट न काढल्याच्या प्रकरणांमधून हा दंड संबंधित प्रवाशांकडून वसूल केला आहे. 

हे माहिती आहे का : 'उजनी'चे पाणी आरोग्य, शेती, जनावरांसाठी घातकच 

यशवंतपूर- लातूर एक्‍स्प्रेसला दोन वाढीव डबे 
सोलापूर विभागावर प्रवाशांची गर्दी वाढत असल्याने आता यशवंतपूर- लातूर- यशवंतपूर एक्‍स्प्रेसला दोन डबे कायमस्वरुपी वाढविण्याचा निर्णय दक्षिण पश्‍चिम रेल्वे प्रशासनाने घेतला आहे. 15 जानेवारीपासून 21 डब्यांसह ही रेल्वे धावणार आहे. यशवंतपूर- लातूर एक्‍स्प्रेसला यापूर्वी 19 डबे होते. आता ही एक्‍स्प्रेस रेल्वे 15 जानेवारीला यशवंतपूरहून तर 16 जानेवारीला लातूरहून 21 डब्यांसह धावणार आहे. नव्या निर्णयानुसार आता या रेल्वेला दोन ब्रेकयान, सहा जनरल डबे तर सहा स्लिपर, तीन एसी थ्री टियर, एक एसी टू टियर व प्रथम श्रेणीचा एक डबा असणार आहे. दक्षिण पश्‍चिम रेल्वे प्रशासनाच्या निर्णयानुसार यशवंतपूर- लातूर मार्गावरील प्रवाशांची सोय झाली आहे. तसेच ओखा- तुतीकोरीन- ओखा एक्‍स्प्रेसलाही एक एसी थ्री टियर डबा वाढविण्याचा निर्णय घेण्यात आला आहे. या दोन्ही निर्णयामुळे रेल्वेच्या उत्पन्नात वाढ होणार असून प्रवाशांचीही गैरसोय टळेल, असा विश्‍वास रेल्वे प्रशासनाने व्यक्‍त केला आहे.