वाळवा : उत्तर प्रदेशचे माजी मुख्यमंत्री व समाजवादी पक्षाचे राष्ट्रीय अध्यक्ष दिवंगत मुलायमसिंह यादव आणि हुतात्मा उद्योग समूहाचे घनिष्ठ संबंध होते. हुतात्मा उद्योग समूहाचे संस्थापक क्रांतिवीर नागनाथअण्णा नायकवडी, मुलायमसिंह यादव यांची मैत्री राष्ट्रीय पातळीवर गाजली होती. डाव्या विचारसरणीचे हे दोन नेते वैचारिक पातळीवर एकत्र आले होते. शेतकरी, कष्टकरी, कामगारांच्या हक्कांसाठी झटणारे सरकार त्यांना अभिप्रेत होते, म्हणून हे दोन्ही नेते हातात हात घालून संघर्ष करत होते.

क्रांतिवीर नागनाथअण्णा नायकवडी व मुलायमसिंह यादव यांची एकजूट नव्वदच्या दशकात झाली. नंतर समाजवादी पक्षाच्या वतीने क्रांतिवीर नागनाथअण्णा नायकवडी यांनी लोकसभेची निवडणूक लढवली. यादव यांनी प्रचारसभाही घेतल्या. नंतर सांगली लोकसभा मतदारसंघात यादव यांनी निवडणूक प्रचारही केला. क्रांतिवीर नायकवडी यांनी काही काळ समाजवादी पक्षाचे प्रदेशाध्यक्षपदही सांभाळले. समाजवादी पक्षाच्या वतीने झालेल्या प्रत्येक घडामोडीत मुलायमसिंह व नागनाथअण्णा यांचा सहभाग होता. समाजवादी पक्षाच्या वतीने दिल्ली येथे निघालेल्या मोर्चात नागनाथअण्णा हजार कार्यकर्त्यांसह सहभागी झाले. हुतात्मा दूध संघाच्या मान्यतेसाठी यादव यांनी स्वतः प्रयत्न केला. हुतात्मा उद्योग समूहाची व यादव यांची वैचारिक नाळ अखेरपर्यंत मजबूत होती. नागनाथअण्णा नायकवडींच्या पहिल्या स्मृतिदिनाच्या कार्यक्रमाला यादव प्रमुख पाहुणे होते.

यादव यांच्या निधनाने हुतात्मा उद्योग समूहात शोकलहर पसरली. उद्योग समूहाचे प्रमुख वैभव नायकवडी यांनी तातडीने लखनौला प्रस्थान केले. वैभव नायकवडी यादव यांच्या अंत्ययात्रेत सहभागी होणार आहेत. ते म्हणाले, ‘‘मुलायमसिंह यादव व नागनाथअण्णा नायकवडी यांनी सामान्य जनतेच्या हक्कासाठी आयुष्यभर संघर्ष केला. बळीचे राज्य यावे, यासाठी ते नेहमी झगडले. यादव यांच्या निधनाने समाजवादी विचारसरणीचे मोठे नुकसान झाले आहे.’’