कोल्हापूर - महापूर आणि अतिवृष्टीमुळे बदललेल्या हवामानाचा फटका जिल्ह्यातील दूध संकलनालाही बसला आहे. जिल्ह्यात सर्वाधिक दूध संकलन असलेल्या कोल्हापूर जिल्हा दूध उत्पादक संघाच्या (गोकुळ) दैनंदिन संकलनात तब्बल दोन लाख लिटरची घट झाली आहे. यात म्हैस दूध ४५ हजार लिटरने, तर गाय दूध संकलन १.४५ लाख लिटरने घटले आहे. यंदा जिल्ह्यात प्रचंड अतिवृष्टी झाली. त्याचा फटका जिल्ह्यातील सुमारे ३५० हून अधिक गावांना बसला आहे. 

सर्वसाधारणपणे ऑक्‍टोंबरनंतर दूध उत्पादनात वाढ होते. फेब्रुवारीच्या दुसऱ्या आठवड्यापर्यंत ही वाढ कायम असते; पण हवामान बदलामुळे या काळातही दूध उत्पादनात वाढ झालेली नाही. त्यातच ‘गोकुळ’ने गाय दूध संकलनात वाढ झाल्याने गायींसाठी असलेल्या सर्व योजना बंद केल्या. ‘गोकुळ’ने म्हशीप्रमाणेच गायीसाठी वासरू संगोपन योजना सुरू केली होती, बाहेरून कितीही गायीचे दूध आले तरी ते स्वीकारले जात होते; पण अलीकडे वासरू संगोपन योजना बंद करण्यात आली. बाहेरून येणारे गाय दूध फक्त ३० ते ४० टक्के स्वीकारण्याचा निर्णय घेतला. त्यामुळे दुभत्या गायी घेतलेला उत्पादक या व्यवसायापासूच दुरावला. त्याचा फटका गाय दुधाच्या उत्पादनावर झाला आहे. संकलनात जरी घट झाली असली तरी ‘गोकुळ’च्या दूध विक्रीत कायम आहे. बाजारात ‘गोकुळ’ च्या दुधाला मागणी प्रचंड असल्याने विक्रीवर घटलेल्या संकलनाचा कोणताही परिणाम होणार नाही, याची खबरदारी vघेतली जात आहे. 

हेही वाचा - हे अपहरण नव्हे; तर म्हणे कर्नाटक पोलिसांची कारवाई 

‘अमूल’ लाही फटका

देशात सर्वाधिक दैनंदिन दूध संकलन असलेल्या गुजरातमधील अमूल दूध संघालाही या बदलत्या हवामानाचा फटका बसला आहे. ‘अमूल’ चे दैनंदिन दूध संकलन दोन कोटी लिटर आहे, त्यात तब्बल ४० लाख लिटरची घट होऊन हे संकलन १ कोटी ६० लाख लिटरवर आले आहे. हरियाना, उत्तर प्रदेश या दूध उत्पादन होणाऱ्या राज्यातही दुधाचे संकलन घटले आहे.

हेही वाचा - ...आम्ही राजे परंपरेचे, तर तुम्ही ज्ञानाचे