राळेगणसिद्धी : "कोट्यवधी रुपये खर्चून होणार नाही अशी जनजागृती आणि लोकशिक्षण मौन आंदोलनातून होत आहे,' असे मत ज्येष्ठ समाजसेवक अण्णा हजारे यांनी आज लेखी संदेशात व्यक्त केले. "निर्भया'च्या गुन्हेगारांना फाशी होईपर्यंत मौन आंदोलन सुरूच ठेवण्याचा निर्धार केल्याने, त्यांचे मौन आज विसाव्या दिवशी सुरूच होते. 

अवश्‍य वाचा- सगळे "पब्जी'त दंग, कोणी उडवेना पतंग 

दरम्यान, मिरजोळी (ता. चिपळूण, जि. रत्नागिरी) येथील दलवाई विद्यालयातील विद्यार्थ्यांनी आज हजारे यांची भेट घेऊन मौन आंदोलनास पाठिंबा दिला. पारनेर पंचायत समितीच्या उपसभापती सुनंदा धुरपते व महिलांनीही हजारे यांची भेट घेतली. पारनेर पंचायत समितीचे नवनिर्वाचित सभापती गणेश शेळके व कार्यकर्त्यांनी स्वतंत्रपणे हजारे यांची भेट घेतली. तसेच, औरंगाबाद येथील अशोक कावळे, पनवेल (रायगड) येथील मिथुन पाटील, निफाड (नाशिक) येथील कैलास कुंटे यांनी व महिलांनी हजारे यांची भेट घेऊन आंदोलनास पाठिंबा दिला. 

अण्णा मौन आंदोलनावर ठाम 

दरम्यान, दिल्लीतील निर्भया अत्याचार व खून प्रकरणातील चारही आरोपींना पतियाळा न्यायालयाने 22 जानेवारी रोजी फाशी देण्याचा निर्णय दिला. मात्र, आपण आताच मौन थांबविणार नाही. निर्भयाच्या आरोपींना फाशी होत नाही, तोपर्यंत आपण मौनावर ठाम असल्याचे ज्येष्ठ समाजसेवक अण्णा हजारे यांनी स्पष्ट केले आहे. 

हेही पाहा - विखे गटाच्या मदतीने भाजपला धोबीपछाड 

आंदोलनाचा 20वा दिवस

विविध मागण्यांसाठी हजारे यांनी 20 डिसेंबर 2019 पासून राळेगणसिद्धी येथील संत यादवबाबा मंदिरात मौन आंदोलन सुरू केले आहे. या मौन आंदोलनाचा आजचा 19वा दिवस होता. पतियाळा न्यायालयाने निर्भयाच्या आरोपींना 22 जानेवारी रोजी सकाळी सात वाजता फाशी देण्याची शिक्षा जाहीर केली. मात्र, त्यानंतरही अण्णा हजारे आपल्या मौन आंदोलनावर कायम होते. शिक्षेची अंमलबजावणी झाल्यावरच आंदोलन मागे घेणार असल्याचे त्यांनी स्पष्ट केले आहे. 

वसतिगृहातील मुलांचा पाठिंबा

अण्णा हजारे यांच्या मौन आंदोलनाला संगमनेर येथील आदिवासी मुलांच्या वसतिगृहातील मुलांनी पाठिंबा दिला, तसेच दिवसभरात शहापूर, ठाणे, शिरूर व सोलापूर येथील काही कार्यकर्त्यांनी भेट घेऊन हजारे यांच्या मौन आंदोलनाला पाठिंबा दिला. तसेच, पारनेरमधील अनेकांनी आज हजारे यांची भेट घेतली.