शिराळा : चांदोली धरण (Chandoli Dam) पाणलोट क्षेत्रात पावसाची संततधार सुरू असून चांदोलीत अतिवृष्टी झाली आहे. धरणात २२१०४ क्युसेकने पाण्याची आवक सुरु आहे. २४ तासांत चांदोलीत ७६ मी.मी. पावसाची नोंद झाली आहे.

धरण व वारणा नदीच्या (Warna River) पाणी पातळीत वाढ होत आहे. त्यामुळे अनेक ठिकाणी वारणा काठाची पिके पाण्याखाली गेली आहेत. पावसाचा जोर वाढल्यास धरणाच्या जलाशय परिचालन सूचीप्रमाणे धरणाची पाणी पातळी नियंत्रित ठेवण्यासाठी धरणातून केंव्हा ही पाणी सोडण्यात येईल.

त्यामुळे वारणाकाठी सावधानतेचा इशारा धरण प्रशासनाने दिला आहे. सोमवारी पावसाचा जोर कालच्या पेक्षा कमी आहे. असला तरी अधून मधून पावसाची संततधार सुरु आहे. सायंकाळी चार वाजता धरणाच्या पाण्याची पातळी ६१७ .६० मीटर आहे. पाणीसाठा ७३९ .०७१ दलघमी असून २६.१ ० टी.एम.सी म्हणजे ७५ .८६ टक्के पाणीसाठा आहे.

रविवारी सकाळी आठ ते सोमवारी सकाळी आठ या २४ तासात ७ ६ मी.मी तर सोमवारी सकाळी आठ ते सायंकाळी चार पर्यंत आठ तासात २२ मी .मी .अशा एकूण ८९४ मी. मी.पावसाची नोंद झाली आहे.कोकरूड ते रेठरे, मांगले -सावर्डे, शिराळे खुर्द- माणगाव हे बंधारे तर पाण्याखाली गेलेले आहेत.

मध्यम प्रकल्प व लपा तलाव पाणीसाठा टक्केवारी

• मोरणा धरण - ५०

• ल.पा.तलाव वाकुर्डे - १००

• ल.पा.तलाव अंत्री बुद्रुक- ६७

• ल.पा.तलाव शिवणी - ३७

• ल.पा.तलाव टाकवे - २५

मंडलनिहाय मी . मी. मध्ये पडलेला पाऊस

• कोकरूड - ५३.८

• शिराळा - ३४.५

• शिरशी - २८.५

• मांगले - २७.३

• सागाव - ३३

• चरण - ४७

पर्जन्यमापक यंत्रावर धरण क्षेत्रातील नोंद

• पाथरपुंज १५४ मिलिमीटर (१९१५)

• निवळे ९७ मिलिमीटर (२०५१)

• धनगरवाडा १०० मिलिमीटर (११७८)

• चांदोली ७६ मिलिमीटर ( ८७२)