सोलापूर : सांगोला (जि. सोलापूर) येथील माजी आमदार गणपतराव देशमुख यांनी राज्याच्या राजकारणात 51 वर्षे आमदारकी भोगली. 2019 च्या विधानसभा निवडणुकीतून त्यांनी स्वत:हून माघार घेतली. गणपतराव देशमुख यांना पहिल्या पाच वर्षांसाठी महिन्याला 50 हजार रुपये तर आमदारकीच्या पुढील प्रत्येक वर्षासाठी दोन हजारांप्रमाणे 92 हजार अशी एकूण एक लाख 42 हजार रुपयांची दरमहा पेन्शन मिळणार आहे. सर्वाधिक पेन्शन घेणारे ते राज्यातील पहिले आमदार ठरणार आहेत. मात्र, त्यांना अद्यापही पेन्शनचा लाभ मिळालेला नाही. 

हेही वाचा - शालार्थमुळे सात हजार शिक्षकांच्या वेतनाचा प्रश्न 

माजी आमदारांना राज्याच्या तिजोरीतून पेन्शन दिली जाते. पहिल्या पाच वर्षांसाठी दरमहा 50 हजार रुपये तर त्यानंतरच्या आमदारकीच्या प्रत्येक एका वर्षासाठी दोन हजारांप्रमाणे वाढ केली जाते. राज्यातील 789 माजी आमदारांना पेन्शनपोटी दरवर्षी 65 कोटी 27 लाख 60 हजार रुपये वितरीत होतात. सद्यस्थितीत पेन्शन योजनेसाठी किती आमदार नव्याने पात्र झाले आहेत, एकूण किती रक्‍कम या योजनेसाठी खर्च होते, याची माहिती संकलनाचे काम सुरु असल्याचे वित्त विभागाचे सचिव राजीव मित्तल यांनी सांगितले. 

हेही वाचा - चिमुकलीला म्हणाला मोर दाखचतो! अन्‌ तिच्यावर... 

राज्याच्या डोक्‍यावरील कर्जाचा डोंगर अन्‌ त्यातून भरावे लागणारे व्याज, शासकीय कर्मचाऱ्यांच्या वेतनावरील खर्च आणि सरकारला दरवर्षी मिळणाऱ्या उत्पन्नाची अपडेट माहिती मुख्यमंत्री उध्दव ठाकरे यांनी वित्त विभागाकडून मागविली आहे. मार्च 2020 मध्ये (राज्याच्या बजेटपूर्वी) श्‍वेतपत्रिका काढण्याच्या हालचालींना वेग आला आहे. राज्यात सध्या माजी आमदारांमध्ये 50 ते 60 हजारांपर्यंत पेन्शन घेणाऱ्यांची संख्या सर्वाधिक आहे. 2019 च्या विधानसभा निवडणुकीत माजी आमदार ठरलेल्यांना अद्याप पेन्शनचा लाभ मिळाला नसून त्यांच्यासाठी आगामी बजेटमध्ये वाढीव तरतूद केली जाईल, असे नियोजन असल्याचेही वित्त विभागातील सूत्रांनी सांगितले. 

हेही वाचा - अहो आश्‍चर्यम...! बोटे मनगटावर टेकविण्याचा असा विक्रम 

ठळक बाबी... 

• राज्य सरकारच्या खांद्यावर 6.71 लाख कोटींच्या कर्जाचा बोजा 
• राज्यातील 789 माजी आमदारांना पेन्शन योजनेचा मिळतोय लाभ 
• माजी आमदार पेन्शन योजनेसाठी दरवर्षी सरासरी 65 कोटींचा खर्च 
• राज्य सरकारने वित्त विभागामार्फत मागविली सद्यस्थितीची माहिती