बेळगाव : जेष्ठ नागरिक म्हणून शासनाच्या पेन्शन योजनेचा लाभ घेणाऱ्या अपात्र लाभार्थींचा शोध घेण्यासाठी बेळगाव तालुक्यातील १५ हजारहून अधिक तर राज्यातील १ लाख ४१ हजार पेन्शन महसूल खात्याने बंद केले आहेत. दरम्यान यात पात्र लाभार्थ्यांची संख्या अधिक असल्याचे दिसून येत आहे.

आधारकार्डमध्ये वयाची चुकीची नोंद करून त्या आधारावर अनेक अपात्रांनी संध्या सुरक्षा योजना अंतर्गत ज्येष्ठ नागरिकांच्या पेन्शनवर डल्ला मारला आहे. कमी वय असतानाही अनेकजण ज्येष्ठ नागरिकांच्या पेन्शन घेत आहेत. मागील दोन वर्षात संपूर्ण राज्यातच ही संख्या वाढली आहे. सामाजिक सुरक्षा योजना अंतर्गत ज्येष्ठ नागरिक, विधवा, दिव्यांग, तृतीयपंथी, चाळीस वर्षेवरील अविवाहित महिला, कर्जामुळे आत्महत्या केलेल्या शेतकऱ्यांच्या पत्नी, ॲसिड हल्ल्यातील जखमी यांना शासनाकडून दरमहा पेन्शन दिली जाते. राज्यात असे सुमारे ६८,९५,६९४ लाभार्थी आहेत. यासाठी शासनाने नुकतेच ७५६१.४८ कोटी रुपये अनुदान मंजूर केले आहे.

मागील दोन वर्षात ५,४६,८६७ लाभार्थ्यांची महसूल खात्याने पेन्शन बंद केली आहे. यापैकी अनेकांनी पेन्शन सुरू करण्यासाठी पुन्हा अर्ज केल्याने त्यांची पाहणी करून पेन्शन सुरू केली जात आहे. यापैकी ४,९९,२९१ जणांची पेन्शन सुरू करण्याची प्रक्रिया हाती घेण्यात आली आहे. तर ९४,०८९ लाभार्थी अपात्र असल्याचे दिसून आले असून त्यांची पेन्शन कायमस्वरूपी बंद करण्यात आली आहे. यासह अध्याप ४७,५७४ जनांची पेन्शन तात्कालिक स्वरूपात थांबविण्यात आली आहे.