जोतिबा डोंगर (कोल्हापूर) : महाराष्ट्र, कर्नाटक, गुजरात, आंध्र प्रदेश या राज्यांतील लाखो भाविकांचे श्रद्धास्थान असणाऱ्या श्रीक्षेत्र वाडी रत्नागिरी तथा जोतिबा डोंगर (ता. पन्हाळा) येथील दख्खनचा राजा श्री जोतिबा देवाची चैत्र यात्रा कोरोनाचा संभाव्य संसर्ग टाळण्यासाठी रद्द करण्यात आली. जिल्हाधिकारी कार्यालयात आज जिल्हाधिकारी दौलत देसाई यांच्या अध्यक्षतेखाली सर्वधर्मीयांची बैठक झाली. या वेळी हा सामुदायिक निर्णय घेण्यात आला. ‘मी कोल्हापुरी सुरक्षित, माझे कोल्हापूरही सुरक्षित’ ही मोहीम जिल्ह्यात राबविली जात असल्याचे जिल्हाधिकारी देसाई यांनी सांगितले.  

हेही वाचा- पोलिस पाटील ठेवणार गावातील परिस्थितीवर लक्ष

इतिहासात प्रथमच चैत्र यात्रा रद्द 

करवीर निवासिनी अंबाबाई मंदिरातील दर्शनासह जिल्ह्यातील चर्च, मशिदीत सामूहिक प्रार्थना बंद ठेवण्याचा निर्णय घेण्यात आला. अंबाबाई मंदिरातील ठराविक पुजारीच पूजा करतील. इतिहासात प्रथमच चैत्र यात्रा रद्द होण्याचा हा प्रसंग आहे. जोतिबाच्या चैत्र यात्रेसाठी डोंगरावर दरवर्षी राज्यभरातून आठ ते नऊ लाख भाविक येतात. वर्षातून एकदा चैत्र यात्रेस जोतिबाची पालखी मूळमाया यमाईदेवीच्या भेटीसाठी जाते. तसेच, यात्रेत मानाच्या ९६ सह विविधरंगी ७०० सासनकाठ्या सहभागी होतात. त्यांची दुपारी भव्य मिरवणूकही निघते.

 हेही वाचा-...तरीही सिंधुदुर्गात दक्षतेचा इशारा

‘मी कोल्हापुरी सुरक्षित, माझे कोल्हापूरही सुरक्षित’ ​

यंदा मात्र सर्व जोतिबा भक्तांना कोरोनाच्या कारणामुळे यात्रेस मुकावे लागणार आहे. गेल्या रविवार (ता. १५)पासून डोंगरावर कोरोनाचा संसर्ग टाळण्यासाठी मंदिर बंद ठेवले आहे. परिणामी, भाविकांची गर्दी होऊ दिली नाही. येणारे भाविक मुख दर्शन व शिखर दर्शन घेऊनच माघारी फिरले. दरम्यान, आज दुपारी पन्हाळ्याचे प्रांताधिकारी अमित माळी यांनी जोतिबा ग्रामस्थ, पुजारी, दहागावकर यांची यात्रेसंदर्भात प्राथमिक बैठक घेतली. त्या बैठकीत कोरोनामुळे होणारे धोके सांगितले.

 हेही वाचा-दीड हजार कर्मचाऱ्यांवर बेकारीची कुऱ्हाड?

दुपारी जोतिबाचे गावकर प्रतिनिधी प्रांताधिकाऱ्यांनी जिल्हाधिकाऱ्यांसमोर यात्रेसंदर्भात पुन्हा चर्चा केली आणि त्यात चैत्र यात्रा रद्द करण्याचा निर्णय घेण्यात आला. या वेळी महापौर निलोफर आजरेकर, आयुक्त डॉ. मल्लिनाथ कलशेट्टी, पोलिस अधीक्षक डॉ. अभिनव देशमुख, निवासी उपजिल्हाधिकारी भाऊ गलांडे, प्रांताधिकारी वैभव नावडकर, कोल्हापूर चर्च कौन्सिलचे सॅमसन समुद्रे, डी. बी. समुद्रे, सेंट झेंवियर्स मौलाना सय्यद, मुल्सिम बोर्डिंगचे प्रशासक कादर मलबारी, मुस्लिम बोर्डिंगचे अध्यक्ष गणी आजरेकर, देवस्थान समितीचे सचिव विजय पोवार, कोल्हापूर जिल्हा बैतुलमाल समितीचे वसीम बशीर चाबुकस्वार, जाफर सय्यद, हजर समितीचे इकबाल देसाई, माजी नगरसेवक आदिल फरास उपस्थित होते.