टाकळी ढोकेश्वर : मांडओहळ धरणातील कान्हूर पठारसह 16 गावे पाणीयोजनेचा प्रश्न पुन्हा ऐरणीवर आला आहे. ही योजना बंद असल्याने या गावांना पाणीटंचाईला सामोरे जावे लागत आहे. यातील कान्हूर पठारसह अन्य ठिकाणच्या ग्रामस्थांनी पंचायत समितीकडे टॅंकरचे प्रस्ताव दाखल केले आहेत. 

धरणावरून कान्हूर पठारसह पिंपळगाव रोठे, पुणेवाडी, गारगुंडी, पिंपळगाव तुर्क, भोंद्रे यांसह अन्य गावांची पाणीपुरवठा योजना आहे. या गावांना उन्हाळा सुरू झाल्यानंतरच या योजनेची गरज दर वर्षी भासते. या योजनेतील लोकसंख्येच्या दृष्टीने मोठ्या असलेल्या कान्हूर पठारला तर मोठ्या प्रमाणात पाणीटंचाईला सामोरे जावे लागत आहे.

हेही वाचा - बघा,आमदार आशुतोष काळे यांच्या घरात काय चाललंय

वातील पाण्याचे स्रोत आटल्याने पाणी विकत घेण्याची वेळ नागरिकांवर आली आहे. ही योजना बंद असल्याने या गावांना टॅंकरने पाणीपुरवठा करावा लागणार आहे. योजना सुरू झाली तरी दुरुस्तीचा खर्च, कर्मचाऱ्यांचे पगार यांसह अन्य प्रश्न उपस्थित होतात. 

सौरऊर्जा प्रकल्प रेंगाळला 
खासदार डॉ. सुजय विखे पाटील यांनी लोकसभा निवडणुकीत, जिल्ह्यातील ज्या पाणीयोजना वीजबिलांच्या थकबाकीमुळे बंद आहेत, त्यांकरिता सौरऊर्जा प्रकल्प कार्यान्वित करून वीजबिलाचा प्रश्न कायमचा मिटवणार असल्याचे सांगितले होते. त्या आश्वासनाचे काय 
झाले, असा प्रश्न येथील नागरिक विचारत आहेत. 
- गोकुळ काकडे, सरपंच, कान्हूर पठार 

अन्यथा रस्त्यावर येऊ 
गावातील पाण्याचे स्रोत अटल्याने टंचाई मोठ्या प्रमाणावर निर्माण झाली आहे. टॅंकरचे प्रस्ताव दाखल केले आहेत. कोरोनाच्या पार्श्वभूमीवर लोकांना अडचणींना सामोरे जावे लागत आहे. यातच पाणीटंचाई निर्माण झाली आहे. आमचे प्रस्ताव तत्काळ मंजूर करा, अन्यथा ग्रामस्थांसह रस्त्यावर उतरू. 
- गणेश शेळके, सभापती, पंचायत समिती