कर्जत : दशकानुदशके प्रलंबित असलेल्या कर्जत-जामखेड तालुक्‍यांतील प्रश्‍नांना थेट विधानसभेत वाचा फुटली. पिचलेल्या जनतेचा "आवाज' आमदार रोहित पवार यांनी नागपूर अधिवेशनात उठवला. पीकविमा, अवकाळी पावसामुळे झालेले नुकसान, कर्जमाफी, प्रकल्पग्रस्त, वाळूउपसा, चाराछावण्यांचे अनुदान, रस्ते, जामखेडचा पाणीपुरवठा, तसेच गोदड महाराज मंदिर परिसराचा विकास, अशा विविध प्रश्नांकडे सरकारचे लक्ष वेधले. 

हेही वाचा ... तर मराठवाड्याचा पाणीप्रश्‍न मिटेल 

आमदार रोहित पवार यांनी फळबाग विमा योजनेतून लिंबू, पेरू आणि द्राक्षे आदी पिकांना वगळल्यामुळे अनेक शेतकऱ्यांचे मोठे नुकसान झाल्याने, कोणतेही पीक वगळू नये. विमा कंपनी आणि प्रशासनातील तांत्रिक अडचणींमुळे 2017-18च्या पीकविम्याची प्रलंबित रक्कम, तसेच अवकाळी पावसामुळे भरपाई द्यावी. कुकडी, उजनी आणि सीना प्रकल्पग्रस्तांना दिलेल्या जमिनी वर्ग-2च्या असल्यामुळे त्या शेतकऱ्यांना अनेक सरकारी योजनांचा लाभ घेता येत नाही. त्यामुळे या जमिनींचे वर्ग-1मध्ये रूपांतर करण्याबाबत आवाज उठविला. 

हेही पाहा बुलेट ट्रेन नको; पिण्याचे पाणी द्या : तनपुरे 

कर्जत तालुक्‍यातील सीना, भीमा नदीपात्रांतून होणाऱ्या अवैध वाळूउपशाला आळा घालावा, तसेच नियमानुसार चालविलेल्या चाराछावण्यांचे प्रलंबित अनुदान द्यावे. नियमभंग केलेल्या छावण्यांवर कारवाईची मागणीही त्यांनी केली. दीड लाख रुपयांपेक्षा अधिक कर्ज असलेले शेतकरी रक्कम भरूनही कर्जमाफीपासून वंचित आहेत. त्यांना तातडीने पैसे देण्याची मागणी त्यांनी केली. 
तीन वर्षांपासून प्रलंबित असलेल्या कर्जतच्या कृषी महाविद्यालयाच्या इमारतीचे काम तातडीने पूर्ण करावे. 

हेही वाचा नेवाशाचा चेहरामोहरा बदलू चला! 

कर्जत आणि जामखेड या दोन्ही तालुक्‍यांच्या पंचायत समित्यांच्या इमारतींची पुनर्बांधणी झाली पाहिजे. जामखेड शहराच्या पाणीपुरवठा योजनेला तातडीने मंजुरी देण्याची मागणीही पवार यांनी केली. मतदारसंघातील अनेक गावांच्या रस्त्यांची परिस्थिती अत्यंत खराब आहे. ग्रामविकास विभागाकडून याकडे तातडीने लक्ष द्यावे. कर्जतचे ग्रामदैवत असलेले संत श्री गोदड महाराज मंदिर परिसराचा तीर्थक्षेत्र विकास आराखड्यात समावेश करण्याची मागणीही त्यांनी केली. 

हे पाहा हजारे यांच्या आंदोलनाला विद्यार्थ्यांचा पाठिंबा 

सोशल मीडियातही लक्षवेधी 
दोन्ही तालुक्‍यांतील प्रश्‍न प्रथमच अधिवेशनात मांडले गेले. सर्वसामान्यांचा आवाज विधानसभेत पोचल्याने कर्जत-जामखेडमधील जनतेत समाधानाचे वातावरण आहे. मतदारसंघासह राज्याच्याही विकासाचा आढावा आमदार पवार यांनी घेतला. त्याचीही चर्चा सोशल मीडियात सुरू आहे. 

प्रश्‍न सोडविण्यासाठी प्रयत्न 
राज्याची आर्थिक स्थिती लक्षात घेता, यातील सर्वच प्रश्न लगेच चुटकीसरशी सुटतील असे नाही; परंतु यांपैकी बहुतांश प्रश्न कसे सुटतील, असा माझा प्रयत्न राहणार आहे. महाआघाडीचे सरकार हे आपल्या सर्वांचेच सरकार असल्यामुळे सगळे प्रश्न सोडविण्याचा माझा प्रामाणिक प्रयत्न राहील. 
- रोहित पवार, आमदार, कर्जत-जामखेड