सांगली : कर्नाटकचे मुख्यमंत्री सिद्धरामय्या (Karnataka CM Siddaramaiah) यांचा रविवारी (ता. २५) धनगर समाजातर्फे (Dhangar Community) येथे नागरी सत्कार केला जाणार आहे. यानिमित्त येथील नेमिनाथनगर कल्पद्रुम क्रीडांगणावर सकाळी १० वाजता काँग्रेस व शेतकऱ्यांचा मेळावा होणार आहे, अशी माहिती आमदार विश्वजित कदम (Vishwajeet Kadam) पत्रकार परिषदेत दिली.

यानिमित्ताने काँग्रेस लोकसभा, विधानसभेच्या पार्श्वभूमीवर जोरदार शक्तिप्रदर्शनही करणार आहे. जत तालुक्याच्या पूर्व भागासाठी कर्नाटकातून पाणी देण्यासह विविध मुद्दे चर्चेला येणार आहेत. त्याअर्थाने हा मेळावा महत्त्वाचा ठरेल, असा विश्वास विश्वजित यांच्यासह प्रदेश उपाध्यक्ष विशाल पाटील, जिल्हाध्यक्ष आमदार विक्रम सावंत, शहर जिल्हाध्यक्ष पृवीराज पाटील, जिल्हा बँकेच्या उपाध्यक्ष जयश्री पाटील यांनी व्यक्त केला.

विश्वजित कदम म्हणाले, "देशात महागाई, बेरोजगारीसह असंख्य प्रश्न निर्माण झाले आहेत. त्याला कर्नाटकच्या जनतेने उत्तर देत काँग्रेसचे सरकार आणले आहे. या सरकारचे मुख्यमंत्री सिद्धरामय्या यांचा महाराष्ट्रात पहिला सत्कार सांगलीत होतोय. त्याला प्रदेशाध्यक्ष नाना पटोले, माजी मुख्यमंत्री पृथ्वीराज चव्हाण, अशोक चव्हाण, विधानसभेतील पक्षनेते बाळासाहेब थोरात उपस्थित राहतील.

देशात वातावरण बदलत असताना सर्वत्रच काँग्रेस एकजुटीने पुढे जात आहे. आमदार विक्रम सावंत म्हणाले, "जत पूर्व भागाला कर्नाटकातून पाणी यावे, त्याबाबत करार व्हावा, यासाठी अनेकदा प्रयत्न झाले आहेत. आता हा विषय निर्णायक टप्प्यावर असून, त्यासाठी सिद्धरामय्या यांचा दौरा महत्त्वाचा ठरणार आहे. उन्हाळ्यात द्यायचे व पावसाळ्यात जतला पाणी घ्यायचे, हाच शाश्वत आणि प्रभावी उपाय आहे.

सांगलीच्या दोन्ही जागा काँग्रेसच्याच

सांगली लोकसभा आणि विधानसभा या दोन्ही जागा काँग्रेसच्या आहेत. आणि राहतील, असा विश्वास आमदार विश्वजित कदम यांनी व्यक्त केला. राष्ट्रवादीने कितीही दावा केला तरी सांगली हा काँग्रेसचा बालेकिल्ला आहे. २०१९ ला शेवटच्या क्षणापर्यंत प्रयत्न करूनही जे घडले, ते होऊन गेले. आता तसे होणार नाही, असा विश्वास त्यांनी व्यक्त केला.