वाळूज (ता. मोहोळ, जि. सोलापूर)  : आपल्या अवीट गोडीने सर्वांना वेड लावणाऱ्या केशर, हापूस आंब्यासह सोलापूर जिल्ह्यातील विविध चवींच्या देशी आंब्याचा हंगाम हवामानातील बदलाने लांबला आहे. जानेवारी उलटत आला तरी अद्यापही आंब्याच्या झाडांना तौर (मोहोर) मोहरलेला नाही. त्यामुळे बाजारपेठेत फळांच्या "राजाचे' म्हणजेच आंब्याचे आगमन उशिराने होणार आहे. 

हेही वाचा - वैयक्तिक योजनांच्या लाभार्थींसाठी दिलासा... 'डीबीटी'ला पर्याय देणार 

गेल्या पावसाळ्यात उशिरा सुरू झालेला पाऊस नंतर मात्र चांगलाच लांबला. परिणामी थंडीचेही उशिरानेच आगमन झाले. अद्यापही हुडहुडी भरायची थंडी सोलापूर जिल्ह्यात अनुभवायला मिळत नाही. त्यामुळे यंदा सोलापूर जिल्ह्यासह शेजारच्या उस्मानाबाद जिल्ह्यातील आंब्याचा हंगाम लांबत असल्याचे शेतकऱ्यांनी सांगितले. सोलापूर जिल्ह्यातील बार्शी, वैराग, पांगरी, माढा, मोहोळ, उत्तर सोलापूर, करमाळा, पंढरपूर, माळशिरस तसेच शेजारील उस्मानाबाद जिल्ह्यातील वाशी, कळंब, भूम, उस्मानाबाद, तुळजापूर तालुक्‍यात आजही काही प्रमाणावर देशी आंब्याच्या आमराया तग धरून आहेत. 

हेही वाचा - अतिवृष्टीचे बाराशे कोटी गेले कुठे... नक्की वाचा 

देशी आंब्यामध्ये अनेक प्रकारचे जसे की, काळू, तुप्या, खोबऱ्या, शेप्या, गोटी, केसऱ्या, केळ्या यासह विविध आकारावरून, चवीवरून त्यांची त्या त्या ठिकाणची स्थानिक नावे वेगवेगळी आहेत. गेल्या काही वर्षांत शेतकऱ्यांनी केशर, हापूस या सुधारीत वाण असलेल्या आंब्याच्या बागांची मोठ्या प्रमाणावर लागवड केली आहे. काही शेतकऱ्यांनी शेताच्या बांधावर आंबा लागवड केली आहे. मात्र यंदा बदललेले ऋतूचक्र आणि हवामानामुळे यावर्षी आंब्याचा हंगाम लांबणीवर जाणार आहे. त्यामुळे आंब्याची चव यंदा उशिराच चाखायला मिळणार आहे. 

हेही वाचा - नगरमधील राडा टळला, धनंजय देसाईंना अटक 

झाडांना अद्याप मोहोर नाही 
गेल्या वर्षीच्या भीषण दुष्काळामुळे आंबा उत्पादन देणारी केशर जातीची 14 वर्षांची 35 झाडे, पाच वर्षांची 375 झाडे आणि नवीन लागवड केलेली एक वर्षाची दोन हजार 500 रोपे पाण्याअभावी जळून गेली. त्यातूनही तग धरून राहिलेल्या आंब्यांच्या झाडांना यावर्षी अजूनपर्यंत मोहोर लागलेला नाही. त्यामूळे यंदा आंबा फळांचा हंगाम लांबणार आहे. 
- रत्नमाला पोतदार, सभापती तथा आंबा उत्पादक देगाव, ता. मोहोळ