कोल्हापूर - "देव तारी त्याला कोण मारी', अशी आपल्याकडे म्हण आहे. काही वेळा अनेकांच्या बाबतीत ही म्हण खरी ठरते. मृत्यूच्या दाढेतून बाहेर येण्याच्या घटना रोज घडत असतात. आजही राहुल पाटील (एतवडे खुर्द, जि. सांगली) यांच्या बाबतीत ही म्हण खरी ठरली. पाटील यांनी तब्बल 40 किलोमिटरचा प्रवास तासभर दुचाकीवरून चक्क नागासोबत केला. ज्यावेळी त्यांना आपल्या गाडीत नाग बसला आहे, हे लक्षात आले त्यावेळी त्यांनी चालू गाडी सोडून उडी मारली आणि जीव वाचविला. 

अधिक माहिती अशी, ऐतवडे खुर्द येथील राहुल पाटील हे कोल्हापुरात नोकरी करतात. नोकरीसाठी रोज त्यांचा एतवडे खुर्द ते कोल्हापूर असा प्रवास होतो. आजही नेहमीप्रमाणे ते दुपारी दोन वाजता घरातून आपल्या दुचाकीवरून बाहेर पडले. ते कोल्हापुरातील महावीर कॉलेज परिसरात आले असता त्यांना दुचाकीच्या मडगार्डमध्ये साप असल्याचे लक्षात आले. पाटील यांना चावा घेण्यासाठी साप बाहेर आला; ज्या गतीने साप बाहेर आला त्या गतीने प्रसंगावधान राखत पाटील यांनी दुचाकीवरून उडी मारली. ते जमिनीवर पडले. त्यावेळी स्थानिक त्यांच्या मदतीसाठी धावले. काहींनी पाटील यांना सावरले तर काहींनी रस्त्याकडेला पडलेली गाडी उचलण्याचा प्रयत्न केला. त्यावेळी पाटील यांनी दुचाकीत साप असल्याचे सांगितले. नागरिकांनी दुचाकीतील साप बाहेर काढला. त्यावेळीही तो चावण्यासाठी इतरांच्या अंगावर धावला. त्यावेळी तो नाग असल्याचे लक्षात आले. सुदैवाने त्याने कोणाला चावा घेतला नाही. इतर छोटे-मोठे साप आढळतात; मात्र दुचाकीत चक्क नागराज बसल्याने सर्वांचीच बोलती बंद झाली. 

हे पण वाचा - Video - वयाच्या 50 व्या वर्षी स्टार्टअप ! दोन मैत्रिणींची अनोखी कहाणी...

'नोकरीसाठी घरातून बाहेर पडलो. पुणे-बेंगलोर महामार्गाने तासभर प्रवास करून कोल्हापुरात पोहचलो. दुचाकीच्या मडगार्डमध्ये बसलेल्या नागाने ऐतवडे खुर्द ते कोल्हापूर तब्बल 40 किलोमिटरच्या प्रवासात साधी हालचालही केली नाही. महावीर कॉलेज परिसरात आल्यानंतर गतीरोधकावर दुचाकी गेल्यानंतर त्याने खोपडीतून तोंड बाहेर काढले आणि गुडघ्याला चावा घेण्याचा प्रयत्न केला. त्यावेळी गुडघा मागे घेत दुचाकीवरून उडी मारली. अचानक घडलेल्या घटनेने प्रचंड घाबरलो; परंतु, स्थानिकांनी तत्काळ मदत केली.' 

-राहुल पाटील 

<

>