कोल्हापूर - आम आदमी पक्ष (आप) महापालिकेच्या सर्व 81 जागा लढविणार असल्याची माहिती प्रदेशाध्यक्ष रंगा सचुरे यांनी आज पत्रकार परिषदेत दिली. सतरा सदस्य प्रचार समितीच्या माध्यमातून नियंत्रण ठेवणार असल्याचे त्यांनी नमूद केले. 

सचुरे म्हणाले, कोल्हापूर महापालिकेची निवडणूक आप पहिल्यांदाच लढवत आहे. दिल्ली येथील सरकार चालविण्याचा अनुभव आमच्या पाठिशी आहे. राजर्षि शाहू छत्रपती महाराज यांच्या नगरीत महाराजांनी विकासाचे आदर्श मॉडेल उभे केले. मात्र नंतर शहराचा अपेक्षेप्रमाणे विकास झाला नाही. रस्ते. पाणी अशा मूलभूत सुविधांचा अभाव कायम आहे. ज्या पद्दतीने गेल्या चाळीस वर्षात कोल्हापुरचा विकास व्हायला हवा होता तितका तो झाला नाही. 

येत्या निवडणुकीत विकासाभिमुख, ढपला संस्कृतीला पायबंद घालणारे, विकासाची अंमलबजावणी करणारे उमेदवार दिले जाणार आहेत. शिक्षण, आरोग्य, घरफाळ्यात सुलभता, वाहतूक व्यवस्था, पर्यटन विकास, हद्दवाढ, क्रीडा असे मुद्दे अजेंड्यावर असणार आहेत. त्यात लोकांचे मत विचारात घेतले जाईल. महापालिका निवडणूक काहीसाठी व्यवसाय झाली ओहे. निवडून येण्यासाठी पैसे लावायचे आणि ते काढून घेण्यासाठी प्रयत्न करायचे ही पद्दत मोडित काढण्यासाठी जनतेकडून देणगी घेऊन निवडणूक लढविणार आहोत. सध्या पन्नास हून अधिक उमेदवार आपकडून लढण्यास तयार आहेत. उर्वरीत जागांवर लवकरच उमेदवार दिले जातील. 

हे पण वाचा - इचलकरंजीतील बेपत्ता यंत्रमाग उद्योजकाचा मृतदेह आढळला पंचगंगेत 

पश्‍चिम महाराष्ट्र अध्यक्ष संदीप देसाई, जिल्हाध्यक्ष नितेश रेडेकर, उतम पाटील आदि उपस्थित होते.  

संपादन - धनाजी सुर्वे