मुरगूड : बाळूमामांच्या नावानं चांगभलं...चा जयघोष, ढोल-कैताळाच्या निनादात, पुष्पवृष्टी व मुक्तहस्ते भंडाऱ्याची उधळण करत श्रीक्षेत्र आदमापूर (ता. भुदरगड) येथील सद्गुरु बाळूमामा यांचा १३१ वा जन्मकाळ सोहळा झाला.

महाराष्ट्र, कर्नाटक, गोवा, आंध्र प्रदेश, राजस्थान राज्यांतील भाविकांचे श्रद्धास्थान असलेल्या बाळूमामांच्या (Admapur Balumama) जन्मकाळ सोहळ्यासाठी भाविकांनी आदमापूरला गर्दी केली होती. बाळूमामांचे मंदिर, गाभारा, समाधीस्थळ व मूर्तीला फुलांनी आकर्षक सजावट केली होती.

बुधवारी (ता. २५) पहाटे श्रींची नित्य पूजा, अभिषेक, आरतीने जन्मोत्सवास प्रारंभ झाला. राजनंदिनी भोसले यांच्याहस्ते वीणापूजन झाले. सायंकाळी बाळासाहेब पाटील यांचे प्रवचन, नानासो पाटील यांची कीर्तन सेवा झाली. माणगावच्या धनगरी बांधवांचे ढोलवादन, आदमापूरच्या भजनी मंडळाने हरी जागर केला.

बाळूमामांचे निर्वाणस्थळ मरगुबाई मंदिरातून श्रींच्या अश्वासह भंडारा समाधीस्थळी आणला. याप्रसंगी भाविक, सुवासिनींनी पालखीसह अश्वाचे औक्षण केले. यावेळी प्रशासक शिवराज नाईकवडे, धैर्यशील भोसले, दत्तात्रय पाटील उपस्थित होते.