कोल्हापूर : उपमुख्यमंत्री अजित पवार यांचा कोल्हापूर पूरस्थिती पाहण्यासाठी नियोजित दौरा रद्द करण्यात आला आहे. आज सकाळी नऊ वाजता ते कोल्हापूर येथे येणार होते. मात्र ढगाळ वातावरणामुळे कोल्हापूर ऐवजी ते सांगलीकडे रवाना झाले. नुकतेच ते सांगलीत दाखल झाले आहेत. भिलवडी निवारा केंद्राची पाहणी सुरु केली आहे.

सांगली दौऱ्यानंतर ते कोल्हापूर कडे येतील असे वाटले होते. मात्र त्याऐवजी ते सांगलीचा दौरा आटोपून सातारा कडे रवाना होणार आहेत. राज्यात अनेक भागात पूरस्थितीची गंभीर परिस्थिती निर्माण झाली आहे. या पार्श्‍वभूमीवर राज्याचे मुख्यमंत्री, उपमुख्यमंत्री विविध भागाचा दौरा करत आहेत. Ajit-Pawar-Kolhapur-flood-visit-cancelled-sangli-palus-visit-satara-rain-update-akb84

उपमुख्यमंत्री अजित पवार नियोजित वेळेनुसार आज सकाळी नऊ वाजता कोल्हापूर येथे येणार होते. या ठिकाणी पूरग्रस्तांना भेटल्यानंतर ते प्रशासकीय अधिकारी आणि लोकप्रतिनिधी बरोबर चर्चा करून एकूण पूरिस्थितीचा आढावा घेणार होते. त्यानंतर शिरोळ या ठिकाणी जाऊन ते पुरग्रस्तांना भेटणार होते. शिरोळ दौऱ्यानंतर ते सांगली कडे रवाना होणार होते. मात्र आज सकाळी कोल्हापूर येथील हवामान अत्यंत ढगाळ होते. त्यामुळे हेलिकॅप्टर उतरू शकत नसल्याने ते थेट कोल्हापूर ऐवजी सांगली कडे रवाना झाले. सांगली दौरा आटोपल्यानंतर ते कोल्हापूरला भेट देतील अशी शक्यता वर्तवण्यात आली होती. मात्र त्यांनी आता सांगली नंतर साताऱ्याकडे रवाना होणार आहेत.