गडहिंग्लज (कोल्हापूर) : कोरोना विषाणुचा प्रादुर्भाव रोखण्यासाठी गर्दीच्या कार्यक्रमांवर बंदी असतानाही मुलाच्या वाढदिवसानिमित्त कार्यक्रमाचे आयोजन केल्याप्रकरणी येथील एकावर गुन्हा दाखल झाला आहे. शरद शिवराम येसरे (वय 50, रा. कोड्ड कॉलनी, गडहिंग्लज) असे त्याचे नाव आहे. अशा प्रकारचा गुन्हा गडहिंग्लज तालुक्‍यात प्रथमच दाखल झाला आहे. दरम्यान, पोलिसांनी हस्तक्षेप करीत वाढदिवसाचा हा कार्यक्रम बंद पाडला. 

हेही वाचा- जनता कर्फ्यू’वर नियंत्रण ठेवणार ही १४ पथके....

गर्दीमुळे पोलिसांनी बंद पाडला कार्यक्रम 
कोरोना विषाणुचा संसर्ग रोखण्यासाठी शासन पातळीवरुन विविध उपाययोजना आखल्या जात आहेत. त्याचाच एक भाग म्हणून जिल्हाधिकाऱ्यांनी गर्दीच्या कार्यक्रमांवर बंदी घातलेली आहे. त्याबाबतची माहिती माध्यमातून देण्यात आली आहे. तसेच पोलिस प्रशासनामार्फतही नागरिकांना आवाहन केले जात आहे. असे असतानाही शरद येसरे यांनी आपला मुलगा सौरभ याच्या वाढदिवसानिमित्त शुक्रवारी (ता.20) सायंकाळी कार्यक्रमाचे आयोजन केले होते. कोड्ड कॉलनीतील राहत्या घरी मित्रपरिवार व नातेवाईक अशा 50 ते 60 लोकांना एकत्र बोलावले होते.

हेही वाचा-तेलनाडे बंधूंचे नगरसेवकपद रद्द...

मुलाचा वाढदिवस आला अंगलट
दरम्यान, कोड्ड कॉलनीत कार्यक्रमासाठी गर्दी झाल्याची माहिती पोलिसांना कळाली. पोलिस तातडीने कोड्ड कॉलनीत दाखल झाले. त्यांनी हस्तक्षेप करीत सदरचा कार्यक्रम बंद करण्यास भाग पाडले. वाढदिवसाच्या कार्यक्रमाच्या नावाखाली मित्रपरिवार व नातेवाइकांना बोलावून जमाव गोळा करुन लोकसेवकांचा आदेश पाळला नसल्याबद्दल शरद येसरे याच्याविरुद्ध येथील पोलिसात गुन्हा दाखल करण्यात आला आहे. पोलिस हेडकॉंस्टेबल विनोद पवार यांनी याबाबतची फिर्याद दिली आहे. पोलिस नाईक राजाराम सूर्यवंशी अधिक तपास करीत आहेत.