कोल्हापूर : शरद पवार (Sharad Pawar) यांच्या पक्षातील दुसरी पिढी कमकुवत आहे. म्हणूनच त्यांना या वयात जिल्ह्यात फिरावे लागते. तालुक्यात लक्ष घालावे लागते. हे पाहून वाईट वाटते, अशी टीका भारतीय जनता पक्षाच्या महिला आघाडी अध्यक्षा चित्रा वाघ (Chitra Wagh) यांनी केली. त्‍या कोल्हापूर दौऱ्यावर आल्‍या असता त्यांनी प्रसार माध्यमांशी संवाद साधला.

यावेळी वाघ म्हणाल्या, ‘अजित पवार (Ajit Pawar) यांच्या कामाचा आवाका प्रचंड आहे. त्यांचा जनसंपर्कही दांडगा आहे. त्यामुळे बारामती लोकसभा मतदारसंघातून सुनेत्रा पवार निवडून येणार हे नक्की आहे. जागावाटपावरून महाविकास आघाडी टीका करत आहे. प्रत्यक्षात यांच्या घराला आग लागली. पण, महाविकास आघाडीचे लक्ष भाजपकडे आहे. आमची काळजी करू नका, आमचे नेते देवेंद्र फडणवीस प्रगल्भ आहेत.

महाविकास आघाडीचे नेते काही बोलताहेत त्यात काही तथ्य नाही. जे होणार ते देवेंद्र फडणवीस चांगल्या पद्धतीने करतील, असा आम्हाला विश्वास आहे. विरोधक रोज सकाळी यायचे आणि तुतारी वाजवत आहेत. मीडिया हेच त्यांचे कुरूक्षेत्र आहे. शब्दांचे पोकळ बाण सोडणे एवढेच त्यांचे काम आहे. त्यांनी जमिनीवरील वस्तुस्थिती पाहिली तर त्यांच्या वल्गना बंद होतील.’