कोल्हापूर : गारगोटीहून कोल्हापूरकडे येत असलेल्या एका आलिशान चारचाकीने इस्पुर्ली (ता. करवीर) येथील घाटात रस्त्याकडेला असलेल्या डाव्या बाजूच्या चरीत गेल्याने पेट घेतला. यामध्ये साने गुरुजी वसाहतीतील महिला चालकासह तिचा मुलगा बचावला. अग्निशमन दलाच्या जवानांनी तत्काळ घटनास्थळी जाऊन पेटलेली चारचाकी विझवून पुढील अनर्थ टाळला. ही घटना आज (रविवारी) रात्री अकराच्या सुमारास घडली. 

इस्पुर्ली घाटात चारचाकीचा ताबा सुटून रस्त्याच्या डाव्या बाजूला अपघात होऊन पेट घेतला. घटनास्थळी अग्निशमन दलाने तत्काळ जाऊन आग विझवली. साने गुरुजी वसाहतीतील एका अपार्टमेंटमधील रहिवाशी असणारी ही महिला आपल्या मुलासह रात्री उशिरा गारगोटीहून कोल्हापूरला येत होती. इस्पुर्ली येथे आल्यानंतर अचानक चारचाकी डाव्या बाजूला ओढली गेली आणि रस्त्याच्याकडेला असणाऱ्या चरीत घुसली व पेट घेतला. दरम्यान, अग्निशमन दलाचा चालक सुनील वाईंगडे, फायरमन गिरीष गवळी, संग्राम मोरे व श्रीधर चाचे या जवानांनी आग आटोक्‍यात आणली.