गडहिंग्लज : येथील उद्योजक संतोष शिंदे आत्महत्येप्रकरणी (Santosh Shinde Suicide Case) संशयित माजी नगरसेविका व सहायक पोलिस निरीक्षक राहुल राऊत यांना पोलिसांनी तपासासाठी फिरवले. माजी नगरसेविकेच्या गडहिंग्लज येथील घराची तर राऊत याच्या निलजी (ता. गडहिंग्लज) येथील घराची झडती घेतली.

तसेच संशयितांच्या बँक खात्यांचा तपशील मागविला असल्याचे समजते. येथील उद्योजक संतोष शिंदे यांनी पत्नी तेजस्विनी व मुलगा अर्जुन यांच्यासह आत्महत्या केली आहे. त्यांना आत्महत्येस प्रवृत्त केल्याप्रकरणी येथील माजी नगरसेविका व राहुल राऊत यांच्यावर गुन्हा दाखल झाला आहे.

पोलिसांनी त्यांना विजापूर येथून अटक केली. सोमवारी दोघांनाही न्यायालयासमोर हजर केले असता ३० जूनपर्यंत पोलिस कोठडी मिळाली आहे. दरम्यान, पोलिसांनी तपासाचा भाग म्हणून काल दोघाही संशयितांच्या घरांची झडती घेतली.

दुपारी बाराच्या सुमारास माजी नगरसेविकेला तिच्या आजरा मार्गावरील घरात आणले. यावेळी घराजवळ पोलिस बंदोबस्त होता. पोलिसांनी घराची झडती घेतली. तर राहुल राऊत याला सायंकाळी सहाच्या सुमारास पोलिस निलजी (ता. गडहिंग्लज) येथील त्याच्या घरी घेऊन गेले होते. त्याच्याही घराची तपासणी केली.

पण, फारसे काही हाताला लागले नाही. मयत संतोष शिंदे यांच्याकडे संशयित माजी नगरसेविका व राहुल राऊत यांनी एक कोटी रुपयांची मागणी केल्याचे फिर्यादीत म्हटले आहे. त्यामुळे दोघाही संशयितांच्या बँक खात्यांचा तपशील पोलिसांनी मागविला असल्याचे समजते.

शिवसेनेचे जिल्हा पोलिसप्रमुखांना निवेदन

आत्महत्येप्रकरणी शिवसेना ठाकरे गटाच्या शिष्टमंडळाने आज जिल्हा पोलिसप्रमुख महेंद्र पंडीत यांची भेट घेतली. आत्महत्येस प्रवृत्त केल्याप्रकरणी अटकेत असलेल्या सहायक पोलिस निरीक्षक राहुल राऊत याला त्वरित निलंबित करावे. तसेच माजी नगरसेविकेच्या पतीच्या मृत्यूची चौकशी करावी, अशी मागणी निवेदनातून केली आहे.