कोल्हापूर: मुख्यमंत्री उद्धव ठाकरे (Uddhav Thackeray) आज सकाळी कोल्हापूर विमानतळावर दाखल झाले आहेत. आज ते कोल्हापूर, सांगलीतील पुरस्थितीची पाहणी करणार आहेत. तसेच पूरग्रस्तांच्या छावण्यांना भेट देणार आहेत.

आता ते शिरोळच्या दिशेने रवाना झाले आहेत. सकाळी ते शिरोळमध्ये जाऊन भेट देणार असून त्यानंतर ते नृसिंहवाडीतील पुरस्थितीचा आढावा घेणार आहेत. कोल्हापुरात दुपारी शाहूपुरी कुंभार गल्ली, शिवाजी पूल या ठिकाणी ते भेट देतील. या दौऱ्यात पालकमंत्री सतेज पाटील, ग्राम विकास मंत्री हसन मुश्रीफ, राज्य आरोग्यमंत्री राजेंद्र पाटील-यड्रावकर, शिवसेनेचे नेते त्यांच्या सोबत पाहणी करणार आहेत.

आज विरोधी पक्ष नेते देवेंद्र फडणवीसही कोल्हापूरचा दौरा करणार आहेत. काल त्यांनी सांगली, शिरोळचा दौरा करून पूरग्रस्त भागाची पाहणी केली.आज ते कोल्हापूर येथील पूरग्रस्त भागाची पाहणी करण्यासाठी येत आहेत.