कोल्हापूर : नाटकाचा (Drama) व्यवसाय हा एक संसारच असतो आणि तो निगुतीने केल्यास नक्कीच त्यात यश मिळते. त्यामध्ये प्रेक्षकांबरोबरच नाट्य वितरकांचे योगदानही मोलाचे राहिले आहे, असे मत अभिनेता संकर्षण कऱ्हाडे (Actor Sankarshan Karhade) यांनी व्यक्त केले. चितळे डेअरी प्रस्तुत सकाळ नाट्य महोत्सवांतर्गत ‘नियम व अटी लागू’ हा नाट्यप्रयोग रंगला.

यानिमित्ताने झालेल्या ‘कॉफी वुईथ सकाळ’ या उपक्रमात त्यांनी मुक्तसंवाद साधला. व्यावसायिक रंगभूमीवर विविध प्रयोग करतानाच कवितांच्या माध्यमातूनही संकर्षण कऱ्हाडे यांनी तमाम मराठी प्रेक्षकांना भुरळ घातली आहे. आजवरच्या विविध कवितांच्या जन्मकथाही त्यांनी यावेळी शेअर केल्या.

ते म्हणाले, ‘‘नाटक आणि कविता दोन्ही गोष्टी हातात हात घालूनच पुढे गेल्या पाहिजेत. दोन्हींतून मिळणारा आनंद नक्कीच वेगळा असतो. नाटक असो किंवा सिनेमात मुंबई, पुण्यात आल्यानंतर सुरुवातीला संघर्ष हा असतोच. पण, तुमच्याकडे असणाऱ्या टॅलेंटच्या जोरावरच आपण या इंडस्ट्रीत घट्टपणे पाय रोवून उभे राहू शकतो.’’

दरम्यान, ‘सकाळ’चे संपादक निखिल पंडितराव, सरव्यवस्थापक (दक्षिण महाराष्ट्र) यतीश शहा यांच्या हस्ते कऱ्हाडे आणि प्रायोजकांचे सत्कार झाले. यावेळी चितळे डेअरीचे दिलीप आपटे, बटू बिल्डर्सचे अभिजित गायकवाड, नीलकमल फर्निचरचे संचालक सचिन सुराणा, शिवसमर्थ मल्टिस्टेट क्रेडिट सोसायटीचे संतोष पवार-देसाई आदी उपस्थित होते.