शिरोली पुलाची (कोल्हापूर) : पुण्याहून आलेल्या येथील वृद्धेचा अहवाल पॉझिटिव्ह आल्याने खळबळ उडाली आहे. संबंधित वृद्धेसह कुटुंब पंधरा मिनिटासाठी घरात आले होते; मात्र ग्रामपंचायतीने त्यांची रवानगी संजय घोडावत विद्यापीठात संस्थात्मक विलगीकरण कक्षात केली. त्यामुळे शिरोलीकरांना धोका नाही; मात्र त्यांच्या संपर्कात आलेल्या लोकांची माहिती घेण्याचे काम सुरू केले आहे. दरम्यान उद्या (ता. 13) व रविवारी ( ता. 14) असे दोन दिवस शिरोली गाव बंद ठेवण्याचा निर्णय दक्षता समितीने घेतला. 

पॉझिटीव्ह वृद्धेसह पाच जणांचे कुटूंब 10 जूनला पुण्याहून आले होते. किणी टोल नाक्‍यावर पोलिसांनी कुटूंबाला संजय घोडावत विद्यापीठात संस्थात्मक विलगीकरण कक्षात जाण्यास सांगितले ; मात्र त्यांनी थेट येथील घर गाठले. शेजाऱ्यांनी ग्रामपंचायत कार्यालयात तक्रार केली. पुण्याहून आल्याची माहिती मिळताच संस्थात्मक विलगीकरण कक्षात जावा, अन्यथा गुन्हे दाखल करण्याचा इशारा ग्रामपंचायत कर्मचाऱ्यांनी दिला. यामुळे पंधरा मिनीटातच ते संजय घोडावत विद्यापीठातील संस्थात्मक विलगीकरण कक्षात गेले. तेथे त्यांची तपासणी केली व वृद्धेचा स्वॅब घेतला. आज सकाळी वृद्धेचा अहावल पॉझिटीव्ह येताच नागरिक भयभीत झाले. पंधरा मिनिट घरी होतो; मात्र आमच्या संपर्कात कोणीही आले नसल्याचे कुटूंबाने सांगीतले. 

ग्रामपंचायतीने परिसर सील केला असून, औषध फवारणी केली आहे. आशा स्वयंसेवीकाच्यावतीने त्या परिसरातील नागरिकांची माहिती घेण्याचे काम सुरू आहे. 

दरम्यान, सरपंच शशिकांत खवरे यांच्या अध्यक्षतेखाली ग्राम दक्षता समितीची बैठक झाली. यामध्ये दोन दिवस गाव बंद ठेवण्याचा निर्णय झाला. आमदार राजूबाबा आवळे, सहायक पोलीस निरीक्षक किरण भोसले, उपसरपंच सुरेश यादव, ग्रामविकास अधिकारी ए. एस. कठारे, सतिश पाटील, सरदार मुल्ला, बाजीराव सातपुते, जोतीराम पोर्लेकर आदी उपस्थित होते. 

शिरोलीत कोरोनाचा शिरकाव झाला असला तरी पॉझिटिव्ह महिला संस्थात्मक विलगीकरण कक्षात आहे. त्यामुळे ग्रामस्थांनी घाबरून न जाता, दक्षता घ्यावी आणि त्यांच्या संपर्कात आलेल्या लोकांनी आरोग्य विभागाशी संपर्क साधावा. 
-शशिकांत खवरे, सरपंच