बेळगाव : कोरोनामुळे मृतांची संख्या वाढली आहे. जुलै महिन्यात कोरोनामुळे सर्वाधिक मृत्यू झाले आहेत. पण बेळगाव शहरात सहा महिन्यातील सर्वात कमी मृत्यूची नोंद जुलै महिन्यात झाली आहे. त्यामुळे कोरोना बाधितांच्या मृत्यूचे नेमके गौडबंगाल काय? असा प्रश्‍न उपस्थित झाला आहे. 

शहरात कोणाचाही मृत्यू झाला तर त्याची नोंद महापालिकेत होते, पण जुलै महिन्यात महापालिकेकडे केवळ 157 कोरोना मृत्यूंची नोंद झाली आहे. अंजुमन ए इस्लामचे अध्यक्ष राजू सेठ यांच्या माहितीनुसार, तेथील स्मशानभूमीत आठवडाभरातच शंभरहून अधिक जणांवर अंत्यसंस्कार करण्यात आले आहेत. मात्र त्यातील सुमारे 60 जण कोरोनाबाधीत होते.

हेही वाचा - मिरजेत कोरोनाने मृत रूग्णाचा अर्धवट जळालेला मृतदेह कुत्र्यांनी पळवला...काय घडले वाचा...

सदाशिवनगर व शहरासह अन्य स्मशानभूमीतही अंत्यसंस्काराचे प्रमाण वाढले आहे. पण त्या मृतांची नोंद महापालिकेकडे झालेली नाही. महापालिकेच्या मते जिल्हा रूग्णालयात एखाद्या व्यक्तीचा मृत्यू झाला तर त्याची नोंद तेथेच केली जाते. एक वर्षानंतर ती माहिती महापालिकेकडे पाठविली जाते. त्यामुळे कोरोनाबाधीतांच्या मृत्यूची नोंद जिल्हा रूग्णालय अर्थात बिम्स येथेच झाली आहे. आता त्याची माहिती एक वर्षानंतरच महापालिकेला दिली जाणार आहे.

हेही वाचा - दख्खनच्या राजाचे मंदिर पाच महिन्यापासून बंद ; डोंगरावरील नागरिकांवर उपासमारीची वेळ

लॉकडाऊनच्या काळात बेळगावातील मृत्यू दर घटला होता. 22 मार्चपासून पुढील एक महिना बेळगावात लॉकडाऊन होता. त्या काळात महापालिकेत सर्वात कमी मृत्यू नोंद झाली होती. महापालिकेतून मिळालेल्या आकडेवारीनुसार मार्च महिन्यात 274 जणांची मृत्यू नोंद तर एप्रिल महिन्यात 218 जणांची मृत्यू नोंद महापालिकेकडे झाली होती. मात्र मे महिन्यात मृत्यूची नोंद वाढली होती आणि पुन्हा जून महिन्यात कमी झाली होती. जून अखेरपर्यंत बेळगाव शहर व जिल्ह्यात कोरोनामुळे मृत झालेल्यांची संख्या कमी होती. मात्र पुन्हा जुलै महिन्यात ही संख्या वाढत गेली. आरोग्य विभागाच्या बुलेटीननुसार 2 ऑगस्ट पर्यंत कोरोनामुळे 75 जणांचा मृत्यू झाला आहे. पण प्रत्यक्षात मृतांची संख्या जास्त आहे. मात्र ही माहिती आरोग्य विभागाकडून जाहीर करण्यात आलेली नाही. 

हेही वाचा -  तोतया सीआयडी इन्स्पेकटर युवतीने अनेकांना घातला लाखो रूपयांचा गंडा पण...

मृतांवर महापालिकेच्या स्मशानभूमीतच अंत्यसंस्कार केले जात आहेत. पण त्या मृत्यूची नोंद मात्र बिम्समध्ये केली जात आहे. मात्र कोरोनामुळे मृत्यू झालेल्यांची अधिकृत माहिती आरोग्य विभागाने महापालिकेला दिलेली नाही. त्यामुळेच प्रत्यक्षात बेळगावात मृत्यू जास्त झाले असले तरी महापालिकेकडे त्यांची नोंद कमी आहे.

जिल्हा रूग्णालय किंवा बिम्समध्ये मृत्यू झाल्यास त्याची नोंद तेथेच केली जाते. एक वर्षानंतर ती माहिती महापालिकेकडे पाठविली जाते. त्यामुळे महापालिकेकडे लागलीच त्याची नोंद होत नाही. 

डॉ. बसवराज धबाडी. आरोग्याधिकारी, महापालिका

गेल्या सात महिन्यातील महापालिकेकडील मृत्यू नोंद 
जानेवारी - 620 
फेब्रुवारी - 423 
मार्च - 274 
एप्रिल - 218 
मे - 417 
जून - 330 
जुलै - 157

संपादक - स्नेहल कदम