बेळगाव - तब्बल २३ दिवसानंतर बेळगाव शहरात नवा कोरोना रुग्ण सापडला आहे. रेल्वे राज्यमंत्री सुरेश अंगडी यांच्या निवस्थानापासून जवळच कोरोना रुग्णाचे घर आहे. शहरात नवा हॉटस्पॉट तयार झाला आहे. शहरात कॅम्प येथे पहिला कोरोना रुग्ण सापडला होता. त्यांनतर आझमनगर, अमननगर व आझाद गल्ली येथे कोरोना रुग्ण सापडला होता. शहरातील हे चारही हॉट स्पॉट तातडीने सील डाउन करण्यात आले होते. या सर्व रुग्णांचे तबलिगी कनेक्शन चर्चेत होते.

ती महिला मुंबई येथील धारावी परिसरात वास्तव्यास

२१ एप्रिल रोजी शहराच्या मध्यवर्ती भागातील आझाद गल्लीतील महिलेला कोरोना झाल्याचे उघडकीस आले त्यामुळे शहर हादरले. पण त्यानंतर गेल्या २३ दिवसात शहरात एकही रुग्ण आढळला नव्हता. पण आता सदाशिवनगर येथे कोरोनाचा शिरकाव झाला आहे. रेल्वे राज्यमंत्री सुरेश अंगडी यांच्या निवास स्थानापासून जवळच कोरोना बाधित महिलेचे वास्तव्य होते. अर्थात ही महिला मुंबई येथून आली असल्याने व ती सात महिन्यांची गरोदर असल्याने ती कुटुंबीय वगळता अन्य कोणाच्या संपर्कात आलेली नाही. त्यामुळे प्रशासनानेही सुटकेचा निःश्वास सोडला आहे. या महिलेच्या कुटुंबातील सर्वांना विलगिकरण कक्षात ठेवण्यात आहे. महापालिकेच्या वतीने तातडीने सर्वेक्षण सुरू करण्यात आले आहे. तो परिसर सील डाउन केला जात आहे. ती महिला मुंबई येथील धारावी परिसरात वास्तव्यास होती अशी माहिती आरोग्य विभागाने दिली आहे. त्यामुळे आता तबलिगी, अजमेर पाठोपाठ कोरोनाचे नवे मुंबई कनेक्शन समोर आले आहे.

वाचा - अन् कोरोना बाधित व्यक्तीने मी लघुशंकेला जाऊन येतो असं सांगत ठोकली धूम...

या महिलेची आधीच आरोग्य तपासणी करण्यात आली होती, शिवाय ती गरोदर असल्यामुळे होम क्वारंटाईन करण्यात आले होते. त्यामुळे केवळ प्रथम संपर्कातील म्हणजे कुटुंबातील सदस्यांनाच क्वारणटाईन करावे लागले आहे. सदाशिवनगर ही उच्चभ्रू वसाहत आहे. त्यामुळे तेथील रहिवाशांमध्ये खळबळ माजली आहे. शहरातील कँप येथील निर्बंधित क्षेत्र रद्द करण्यात आले होते. त्यामुळे तीन निर्बंधित क्षेत्र शिल्लक होते. हे तिन्ही क्षेत्र रद्द करण्याच्या हालचाली सुरू असताना नवे निर्बंधित क्षेत्र तयार झाले आहे. या नव्या निर्बंधित क्षेत्राची घोषणा आज जिल्हाधिकाऱ्यांकडून केली जाईल.