कोल्हापूर : कोरोनाने आजारी महापालिका कर्मचाऱ्यांच्या उपचाराचा खर्च महापालिका करेल, अशी ग्वाही काल प्रशासनाने स्थायी समिती सभेत दिली. सभेच्या अध्यक्षस्थानी सभापती सचिन पाटील होते.
जय पटकारे यांनी विचारले, कोविडमध्ये काम करणारे रोजंदारी अथवा मानधनावरील कर्मचारी मृत झाल्यास त्यांना काय संरक्षण दिले आहे? आरोग्य निरीक्षकांनाही विमा कवच नाही. रोजंदारी कर्मचारी फिल्डवर आहेत. एक २९ वर्षांचा कर्मचारी मृत झाला आहे. त्याला महिन्याचे बाळ आहे. तो कोविडमध्ये काम करत असल्याने त्याने बाळाला हातातही घेतले नव्हते. आता तो मृत झाला असल्याने त्याची घरची स्थिती नाजूक आहे. त्याच्या कुटुंबाला मदत करावी.
प्रशासनाने सांगितले, सलग चौदा दिवस कोविडचे काम करत असताना त्या कर्मचाऱ्यास काही झाल्यास त्याला ५० लाखांचे विमा कवच शासनाने दिले आहे. अशा दोन कर्मचाऱ्यांचा प्रस्ताव शासनास सादर करीत आहे. याबरोबरच या कर्मचाऱ्याचाही प्रस्ताव सादर करू. अशा कर्मचाऱ्यांसाठी जेवढे करणे शक्‍य आहे ते करत आहे.
शारंगधर देशमुख म्हणाले, ‘‘स्वच्छतेचे काम उच्च पातळीवर सुरू आहे. गेल्या वर्षी महापुरात कर्मचाऱ्यांनी चांगले काम केले आहे. मग कोल्हापूर पालिकेची स्वच्छ भारत सर्वेक्षणामध्ये स्वच्छतेबाबत रॅंक १६ वरून ३० वर का आली? याच्यामागची कारणे कोणती आहेत.’’
प्रशासनाने सांगितले, ‘‘स्वच्छ सर्वेक्षणामध्ये निवड करताना गुणाच्या आधारावर निवड केली जाते. थ्री स्टार रॅंकिंगसाठी ७०० गुण आहेत. हे गुण १०० टक्के कन्टेनरमुक्त शहरासाठी धरले जातात. ज्या वेळेस सर्व्हेसाठी पथक आले त्या वेळी त्यांना काही प्रभागात मुख्य रस्त्यावर कंटेनर आढळले. त्यामुळे आपल्याला गुण मिळाले नाहीत.’’
पूजा नाईकनवरे म्हणल्या, ‘‘शाहूपुरी पाण्याची टाकी येथील बीओटी शौचालयाचे काय झाले? गेले दोन वर्ष प्रश्न मांडत आहे.’’
शारंगधर देशमुख म्हणाले, ‘‘नगररचना विभाग अद्याप सुरू नाही. कोविडचे कारण सांगून ऑफिस बंद आहे. या विभागातील फाईली गायब करण्याची टोळी सक्रिय झाली आहे. प्रलंबित फायलींबाबत पुढील आठवड्यात कॅम्प घ्या.’’
विजय सूर्यवंशी म्हणाले, ‘‘डीपी प्लॅनचे काय झाले? संबंधित फाईल गहाळ झाल्यामुळे त्या व्यक्तीलाच पुन्हा नवीन फाईल तयार करण्यासाठी सांगितले जाते. ज्याच्याकडून फाईल गहाळ झालेली आहे त्याने स्वखर्चाने ती फाईल पुन्हा तयार करावी. यामध्ये नागरिकांना त्रास देऊ नये.’’ फायली गहाळ करणाऱ्यांवर कारवाईची ग्वाही प्रशासनाने दिली.
संपादन - अर्चना बनगे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.